Sinais para a ruta do sur

Francisco Albo

LEMOS

Os defensores do Camiño de Inverno piden de novo á Xunta medidas para rehabilitar o itinerario histórico

23 oct 2007 . Actualizado a las 02:00 h.

A sinalización e a construción de albergues son medidas básicas para a rehabilitación do Camiño de Inverno como itinerario cultural, reiterou a directiva da asociación Camiños a Santiago pola Ribeira Sacra en resposta ao anuncio da Dirección Xeral de Turismo de que promocionará este itinerario histórico como unha ruta xacobea máis. «A promoción é importante, pero a sinalización é básica», apuntou a este respecto Aida Menéndez, presidenta da mencionada entidade, unha vez terminadas as terceiras xornadas sobre o Camiño de Inverno, que se desenvolveron durante a fin de semana en Chantada.

Menéndez considera moi positivo o feito de que Turismo decidise implicarse máis a fondo na recuperación do Camiño de Inverno, pero sinala que a ruta está aínda moi lonxe de contar coa infraestrutura necesaria para funcionar a un nivel comparable ao das demais rutas xacobeas. «Polo que toca á zona sur lucense, xa dixemos anteriormente que faría falta polo menos abrir un albergue en Monforte e outro en Chantada», recorda. Por agora, o único municipio do tramo lucense da ruta que conta cun albergue é o de Quiroga. O Concello de Ribas do Sil, por outro lado, rehabilitou un antigo edificio escolar en Torbeo para transformalo en albergue e proxecta facer o mesmo con outras dúas vellas escolas en Nogueira e Peites, nunha iniciativa que por agora non tivo paralelo noutros municipios. A colocación de sinais homoxéneos ao longo da ruta e o arranxo e a limpeza dos tramos peor conservados son outras reivindicacións formuladas con frecuencia por esta asociación.

Petición a Patrimonio

O colectivo que preside Aida Menéndez, por outro lado, enviará proximamente á Dirección Xeral de Patrimonio toda a documentación histórica que puido reunir ata agora sobre o Camiño de Inverno -e que xa lle fora remitida previamente a Turismo- para apoiar a petición de recoñecemento da ruta. Este organismo é o que conta coa potestade para recoñecer oficialmente a existencia das diferentes rutas de peregrinación a Santiago.

Con respecto á documentación histórica sobre a ruta, Menéndez indica que cada vez é maior o número de datos que están conseguindo reunir os expertos nas diferentes zonas de Galicia e do Bierzo polas que pasa este itinerario. «Nas xornadas que acabamos de ter en Chantada houbo unha intervención moi interesante do historiador Elixio Rivas Quintás, quen dixo que este camiño xa existía incluso con anterioridade ao Camiño Francés», comenta. Rivas, membro da Real Academia de la Historia, tense distinguido na recuperación do chamado Camiño Mozarábe que enlaza Andalucía con Santiago e que coincide en parte coa célebre Vía da Prata.