TRIBUNA | O |
18 may 2004 . Actualizado a las 07:00 h.DIFÍCIL vaino ter o Celta para evadir o descenso. Pero non todas as empresas de Horacio Gómez, o Presidente, atravesan por tantas dificultades. Polo que me din algúns empregados da Fontecelta, ultimamente están que non dan feito para abastecer ao mercado. Sirva o deles como exemplo. Así, dinme que tralo contrato con Eroski, no mes de marzo pasado saíron máis botellas de auga da fábrica que en todo o de agosto do 2003. Para quen non o lembre, esta era unha daquelas empresas do hólding Rumasa, propiedade de Ruíz Mateos. Tras anos de dificultades, os resultados agora semellan ser tan satisfactorios que é unha das contadiñas empresas desta zona da provincia que mantén as tres quendas de traballo ó longo do día. O que debera ser corrente, convértese en extraordinario cando se analiza o tecido industrial que hai, espallado, pola provincia. Moitos concellos nin sequera teñen solo industrial para que poidan medrar e coller futuro as empresas da zona. ¡Como para vir as de fóra! E onde o hai, o solo, a miúdo semella un deserto, talvez forzado pola falta de incentivos. E tamén de emprendedores ávidos de arriscar aquí parte do seu capital.