A lectura é entendida habitualmente como unha actividade solitaria, pensamos na imaxe dunha butaca e un punto de luz, como o fermoso logo da editorial Cuarto de Inverno. Con todo, a proliferación dos clubs de lectura en bibliotecas públicas, librerías ou asociacións culturais dinos que tamén se agradece compartir a experiencia dos libros. Os institutos non son alleos a estas quedadas literarias importadas do mundo anglosaxón e o profesorado aproveita este formato máis informal e fóra do horario lectivo para fomentar o hábito lector e tamén, en moitos casos, para que gocen da lectura en galego.

A min gustábame artellar xantares literarios que compartía co meu alumnado os luns, aproveitando que había clase á tarde. Aquelas horas en que o centro quedaba baleiro e se enchía de palabras e, moitas veces, de autoras e autores que nos visitaban, era un momento único. Hai uns días saía a listaxe dos libros máis lidos o pasado curso nos clubs de lectura de secundaria e a autora de referencia é Ledicia Costas, non só porque Infamia sexa o título de maior éxito, senón porque varias obras da autora aparecen entre os postos máis destacados. A carón dela Eva Mejuto, María Solar, Arantza Portabales, Domingo Villar, Andrea Maceiras, Antía Yáñez, María Reimóndez ou Iria Misa, nomes ben coñecidos da nosa narrativa. Porque o que si é certo é que nos clubs de lectura poucas veces se len teatro, poesía ou ensaio, aínda que a experiencia de mudar de xénero sempre é positiva. De feito, o confinamento obrigounos a cambiar de lecturas e, no meu caso, o alumnado pediu poesía porque permitía ler sen o alento que require unha novela. Ismael Ramos foi o convidado, e a experiencia demostrounos que non hai nada mellor que rachar cos prexuízos sobre o que cremos que nos gusta. Refrescarnos con versos. Comezan os clubs de lectura e ábrese unha nova oportunidade de compartir, de ler en común.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Tags
Comentarios

O pracer de ler en común