O hosteleiro compostelán impartirá o día 27 unha xornada formativa na AED que conta cunha vintena de inscritos
21 oct 2014 . Actualizado a las 06:00 h.A sede da Asociación de Empresarios de Deza (AED) acollerá o vindeiro luns, a partires das 17 horas, unha xornada informativa para o sector da hostalaría dezá que impartirá o coñecido barista compostelán Óscar de Toro. O tamén hostaleiro falará do café, de parámetros e de ingredentes, de técnica e de moído.
-Non deixa de ser significativo cunha bebida non puidese consumirse no século XVII en Europa a consumirse máis de 2.000 tazas ao día...
-Pensa que é a segunda materia, despois do petróleo, con maior posicionamento no mundo. Iso xa o significa todo. A demanda por parte do público é dun café de calidade e os cursos que veño impartindo, como o do próximo luns en Lalín, é para que os hostaleiros teñan máis coñecementos e cheguen mellor ao público.
-¿Pode non gustarche o café?
-Non concibo que a unha persoa non lle guste o café. Ollemos a forma en que se preparou. Probablemente fallou a preparación ou o momento non era o axeitado. Gústame cun café pase a ser o café con maiúsculas. Cando probas un café de orixe noble, 100 % arábica, ben feito, cuns parámetros de infusión e de temperatura sae un excelente produto. Nas miñas charlas aporto formación e logo o hostaleiro colle o que quere para o seu negocio, que é quen mellor coñece o seu. Os hostaleiros carecen en gran medida desta ferramenta, que é a formación, e con estes cursos facemos que saiban e que transmitan ditos coñecementos aos seus clientes que é o importante.
-Materia prima, auga, máquina de café, ¿todo inflúe no resultado final?
-Aquí hai dúas cuestións: os parámetros e os ingredentes. Na primeira está, por exemplo, a máquina, o muíño cuxa limpeza é fundamental; e nos ingredentes non podemos esquencernos de que nun café o 98 % é auga. A pulcritude no servizo é moi importante. Hai pasos que deben seguirse. Cando probas un bo café estimulas á clientela.
-¿Cal é o mellor café?
-Non vendo marcas de café, e tampouco de leite, pero un 100 % arábica é o mellor.
-¿Con azucre?
-É a pregunta do millón... Como lle guste ao cliente; con azucre, con leite, manchado, templado ou moi quente... Só é cuestión de disfrutalo.
óscar de toro barista