Comercializa as súas xoias a través de Internet
18 oct 2012 . Actualizado a las 07:00 h.Estudou Psicoloxía e leva un tempo traballando nesta área, fundamentalmente no eido da formación; pero, desde hai un tempo, pola cabeza da boirense Paula Tubío rolda a idea de abandonar este mundo para dedicarse profesionalmente á súa gran paixón: deseñar e confeccionar xoias. Esta é unha afección que ten desde hai anos e á que empezou a darlle forma empresarial a través de Internet. O aceptable nivel de ventas acadado dálle pulos para seguir adiante. Estes días amosa parte das súas creacións no centro social de Boiro, baixo o título Lío de palangre.
-¿Como nace esta afección?
-O certo é que non sei como naceu, sempre fixen algo disto. Xa na Universidade confeccionaba diferentes pezas, sobre todo pendentes, empregando vidro, coiro e metais.
-Pero, ¿de onde lle veu a idea de iniciarse nisto?
-Pois son bastante autodidacta. Vexo as cousas e búscome a vida para experimentar e tentar elaboralas.
-¿Que se pode atopar o público na exposición do centro social boirense?
-Están, por unha banda, as pezas feitas con materiais de reciclaxe, como uñas de percebe e cunchas de moluscos; e logo, as xoias inspiradas no mar pero feitas a partir de abaloiros, metais, redes e tela.
-Se tivera que elixir algunha das pezas que se expoñen, ¿con cal se quedaría?
-A que máis chamou a atención é un torque percebe, é un aramio forrado de tela que remata en unllas de percebe. Os raxos de polbo e o broche mexillón tamén gustaron moito. Logo están o colar e a pulseira alga, que tentan evocar aquela época da nenez que todos pasamos na praia, colgándonos algas polo corpo.
-¿Como se lle ocorreu dar o salto ao eido comercial?
-Pois decidín probar a través dunha páxina web e tiven aceptación. Agora, coa exposición, tamén me chegaron varios pedidos. É un traballo que me gusta moito e, se podo vivir disto, non o vou dubidar, voume lanzar seguro.
-¿Pensa que o futuro de negocios coma o seu está en Internet?
-Seguro. Eu empecei a dar a coñecer o meu traballo por achegados e, logo, por Internet. A través das tendas e das feiras podes vender, pero a día de hoxe hai máis mercado na Rede.
-¿A que tipo de clientes se dirixe?
-Os meus clientes, polo de agora, son mulleres de entre 25 e 40 anos e, claro está, tento adaptar o que fago a este público. Aínda que teño algún pedido de fóra, a maioría dos clientes son galegos, e o certo é que tamén fago moitas pezas relacionadas coa cultura autóctona. Empecei cun broche pandeireta que está seleccionado para o premio de artesanía Antón Fraguas. É unha colección que inclúe tamén pendentes e anel.
-¿Cal é a súa peza favorita?
-Gústame moitísimo a pandeireta. Foi coa que empecei e coa que abrín o blog, polo que lle teño un cariño especial. Da nova colección, quédome coa pulseira e o colar algas.
-¿Como ve o futuro? ¿Pensa abrir unha tenda?
-Quero ampliar o espectro e facer camisetas ou bolsos. O de abrir tenda non o descarto pero, a día de hoxe, penso que un negocio é moito máis arriscado que Internet.
paula tubío deseñadadora de bixutería