O cociñeiro amosará as virtudes das razas autóctonas no salón Salimat
29 may 2015 . Actualizado a las 05:00 h.A Antonio Díaz (Pontedeume, 1976), propietario do restaurante Andarubel, agárdalle un desafío comparable ás máis duras probas de Masterchef. Nada máis e nada menos que elaborar preto de mil menús degustación para os comensales que se darán cita en Salimat, o Salón de Alimentación do Atlántico, que se celebrará entre o 11 e o 14 de xuño en Silleda. As súas suculentas creacións poderán catarse en TapiRazas, un espacio adicado ás tapas no que todas as elaboracións terán como protagonista ás carnes das razas autóctonas: cachena, caldelá, frieiresa, limiá, vianesa, ovella galega, cabra galega e galiña de Mos. Díaz chegará alí da man de Boaga, a Federación de Razas Autóctonas de Galicia.
-¿O padal galego está afeito xa a estes produtos?
-Empezánse a coñecer mellor porque na tele fálase delas, sobre todo da cachena e do galo de Mos, pero unha cousa é coñecelas e outra moi distinta é compralas é probalas. A xente aínda non as proba, pero os maiores que o fan quedan sorprendidos, porque din que estas carnes lles transportan aos sabores da infancia, á Galicia de hai moitos anos.
-Tal vez o problema está en que non é doado atopalas nas prazas.
-Algúns postos empezan a ofrecelas, pero a súa presenza aínda non é significativa. O problema está en que son razas en perigo de extinción, que proceden de explotacións pequenas que non producen tanto como as que fornecen ás canles industriais.
-¿E iso como se pode remediar?
-Eu penso que aí xogamos un papel moi importante os restaurantes, porque podemos facer moito pola súa difusión. É o que pasou no Eume, por exemplo, coa tenreira cachena. Ao principio ninguén a coñecía, pero hai seis anos comenzamos a organizar unhas xornadas gastronómicas dedicadas á súa carne e agora se pide moito máis. Se os restaurantes conseguimos que a xente coñeza estas razas, aumentará a súa demanda e iso fará posible que os gandeiros poidan ampliar as súas explotación e aumentar as súas marxes de beneficio, que agora son moi baixas.
-Intente convencerme. ¿Por que temos que probar a carne destas razas?
-Sinxelamente, porque estas carnes son un espectáculo. Teñen un sabor e unha textura que non ofrecen as carnes que chegan aos mostradores polas canles industriais. Normalmente son carnes máis feitas, con máis sabor, que aportan sensacións distintas. É un produto diferenciado destinado a un consumidor que non vai só ao prezo, senón que busca calidade.
antonio díaz Propietario do restaurante andarubel (pontedeume)