Un policía xubilado cóntame que as patrullas nocturnas, os enlaces infiltrados (topos) en ambientes de delincuentes, os informadores aos que hai que pagar, o coñecemento do mundo do hampa... son traballos preventivos necesarios. Hai roubos, certo, pero cantos outros se evitan precisamente con esas accións preventivas? Mais os roubos e crimes evitados, como non existiron, non son aplaudidos. Coa acción antiterrorista pasa igual. Cantas vidas se salvan grazas ás accións preventivas, desarticulando grupos que estaban a piques de cometer un atentado? E coa medicina preventiva evitamos moitas enfermidades. Esta obviedade haina que repetir moitas veces, porque aínda non somos conscientes da súa importancia. Na pandemia actual hai medidas preventivas. O acto de lavarse as mans salva vidas. Desinfectar vinte veces ao día un supermercado é eficaz.
O confinamento foi unha medida preventiva e salvou miles de vidas. Cantos miles de vidas? Os matemáticos fixeron simulacións no caso de non ter realizado o confinamento. Que cada quen pense na súa propia vida, e na vida de familiares... Se un político retira fondos de policía preventiva contra grupos terroristas diremos que toleou ou que é un irresponsable perigoso. En USA, por exemplo, non cren nas accións preventivas sanitarias. Falsean cifras de contaxios e mortos. Coa propaganda tápase todo. En España levamos anos imitando o estilo da política americana. Unha confusión que quere contaxiar da súa confusión a todo o mundo.