Entrevista | José Antonio Varela Quintela, «Pincho» O máximo goleador roxinegro atribuíu o seu discreto rendemento tralo Nadal a un problema físico que dá por superado, e di que trala victoria do sábado o equipo deixou atrás o seu bache
21 feb 2006 . Actualizado a las 06:00 h.O Portadeza Lalín recuperou o pasado sábado a senda do triunfo liderado por un Pincho en estado puro. O primeira liña roxinegro, reconvertido este ano en organizador do equipo, amosou a mellor das súas imaxes asinando 15 tantos. Unha marca ata entón inédita no seu historial deportivo, e que coincide coa desaparición dos problemas físicos que, desvelou o xogador, viñan mermando o seu rendemento desde o Nadal. Satisfeito coa notable melloría do seu xogo de equipo esta tempada, o máximo goleador roxinegro traballa agora co obxectivo de ser tamén mellor defensor. -Quince goles son moitos goles nun só partido... -Foi a confluencia de varios factores. Viña de facer varios malos partidos, nos que non estivera á altura do que era habitual en min, e quería cambiar iso. Desde o Nadal tiña unha dor na parte posterior do muslo esquerdo, que me facía perder velocidade e potencia no salto. Non estaba cómodo. Esa dor desapareceu o outro día, e atopeime ben de novo. E logo estivo a defensa do rival, propicia para o meu tiro. -¿Estamos ante a mellor tempada de Pincho? -Penso que manteño unha liña similar á tempada pasada, e que estou a facer unha boa campaña. Nas últimas semanas sufrín ese baixón físico. Pero se chegamos á fase de ascenso, creo que podería facer unha tempada mellor cá anterior. Mellorei o meu xogo colectivo. Antes custábame moito ver o extremo. Vía un oco na defensa rival, e sentía a seguridade de que podería aproveitalo co meu lanzamento, sen decatarme de que ao mellor o meu compañeiro do lado tiña mellor posición de tiro. Agora tamén vexo o extremo e o pivote, e xogo con eles. Niso axudoume que esta tempada estea xogando sobre todo no central e no lateral esquerdo, ao ter Porto máis minutos. De feito, cando o fago no lateral dereito, onde xoguei case sempre ata este ano, síntome un pouco desubicado. -¿Cambiaría algo no seu xogo? -Sobre todo, a defensa. Nunca foi o meu forte, quizais porque nunca puxen as ganas suficientes para facelo mellor. Esta tempada estou adestrándome coa idea de avanzar nesta faceta. -¿O triunfo sobre o Ademar B é a fin do bache do Portadeza? -Si. Salvamos o bache no momento ideal, na peor semana da tempada, na que menos podemos traballar pola Gala do Cocido. A Liga é moi longa, acumulamos moita carga de traballo e na primeira volta estivemos en todo momento a un gran nivel. Marcámonos un nivel de esixencia moi alto, e todo iso pasou factura. Pero mellor que tivese sido a estas alturas, e non ao final da Liga.