«José Rodríguez foi un pioneiro»

Iván Fernández, colaborador do Observatorio Ramón Aller, afondou na labor do matemático de Bermés


Lalín / la Voz

Onte presentouse en Lugo a revista Lucensia, editada pola Diocese nun acto na Aula Magna presidido polo bispo Alfonso Carrasco Rouco. Entre os artigos desta publicación figura un sobre a figura do matemático lalinense, nado na parroquia de Bermés, José Rodríguez. O matemático Iván Fernández, colaborador do Observatorio Ramón María Aller da USC é o autor deste artigo no que se analiza a actividade científica de Rodríguez. Fernández agradecía onte aos responsables da revista a súa labor de difusión da cultura e da ciencia e tamén especialmente o feito «de que poida facerse en galego, xa que desgraciadamente cada vez é máis difícil». É o número 57 da revista, dirixida por Gonzalo Fraga, que presidiu xunto co bispo e o reitor do seminario de Lugo, David Varela, a presentación.

-Como xurdiu o tema, porque José Rodríguez?

-Son matemático e interésame a historia das matemáticas e da astronomía. Dentro destes campos, o que máis me interesa son os persoeiros e institucións que contribuíron ao desenvolvemento destas disciplinas na nosa terra.

-Quen é para vostede o matemático Rodríguez?

-Rodríguez foi un pioneiro. Rachou coa falta de interese do profesorado universitario da época en abrir novos horizontes, investigar e contribuír á sociedade cono novos coñecementos.

-Vostede que é matemático, cre que se coñece a súa figura na Universidade?

- Na Facultade de Matemáticas é algo máis coñecido, xa que se instalou o seu vítor na Aula Magna. Pero a miña sensación é que Rodríguez segue a ser bastante descoñecido, tanto dentro da Universidade como fóra dela.

-Como foi o proceso de recompilar información, foi doado atopar datos?

-A información non é difícil de atopar. Están nos arquivos e hemerotecas, moitas delas dixitais, ás que pode acceder calquera cidadán. Despois hai que ter moito tempo e dedicación para analizar esa información e, unha vez coñecido o que se ten publicado sobre o tema, cando vexo que se pode achegar algo novidoso é cando me poño a redactar.

-Qué destacaría da súa vida, que che chamou máis a atención?

-Rodríguez sabía que para progresar tiña que saír de Galicia e viaxar a distintos países de Europa para formarse cos mellores. El foi quen de saír deste recuncho do Noroeste nun momento no que as comunicacións e os medios de transporte non eran as de hoxe.

-E do seu traballo?

-O seu rigor. Nótase a que facía o seu traballo con moita meticulosidade.

-Vostede é matemático é colabora co Observatorio Ramón María Aller como foi iso?

-Son de Ourense e cheguei a Compostela en 1993 para cursar a carreira de matemáticas. Nos últimos anos de carreira, José Ángel Docobo, director do Observatorio Astronómico Ramón María Aller, buscaba alumnos para atender xornadas de portas abertas e sesións de observacións nocturnas, e así comezou a colaboración. Máis tarde viñeron campañas de observación noutros observatorios astronómicos, a tese de doutoramento, redacción de traballos… E a última colaboración foi a organización da exposición O legado científico das forzas armadas en Galicia e dos galegos pertencentes ás forzas armadas.

-Como enfocou o artigo?

-Neste artigo dediqueime a seguir o que fixo Rodríguez durante a súa estadía en Madrid como profesor de astronomía e como director do observatorio astronómico de Madrid.

-Que pretendía transmitir?

-O que pretendo é transmitir os seus esforzos por recuperar este último centro e poñer en valor as súas achegas científicas deste período. Así, no calendario que elaborou para o ano 1823 aparece un pequeno artigo sobre meteoritos no que se xuntan as súas grandes paixóns, a astronomía e a xeoloxía, disciplina esta última na que elaborou un artigo sobre a composición xeolóxica de Sierra Nevada e que se publicou na revista francesa Annales de Chimie et de Physique en 1822, que estaba dirixida por Gay-Lussac e polo seu amigo Arago. Ao fío disto, xúntase tamén cos manuscritos que tiña Rodríguez sobre xeoloxía (anteriormente denominada xeognosia) e que hoxe se atopan na Biblioteca Xeral da Universidade de Santiago de Compostela, de grande valor, pois proceden de leccións de Werner, o pai desta disciplina.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«José Rodríguez foi un pioneiro»