A filóloga da Pobra do Caramiñal oficializou o seu ingreso na Real Academia Galega cun discurso sobre a onomástica
11 dic 2021 . Actualizado a las 18:21 h.Pouco despois do mediodía deste sábado, Ana Isabel Boullón Agrelo tomaba posesión como membro de número na Real Academia Galega nunha cerimonia pública celebrada no Teatro Cine Elma da Pobra do Caramiñal. Esta designación vén após do pasamento en marzo do 2020 de Xosé Luís Franco Grande, a quen a filóloga homenaxeou nada máis comezar o seu discurso de ingreso, que levaba por título Todos os nomes: identidade, pobo, país.
Coas súas verbas, Boullón quixo lembrar a quen lle precedeu, destacando non só o seu labor de poeta, senón tamén como o lexicógrafo que escribiu o dicionario que a propia académica tomaba de referencia durante a súa licenciatura. «Formamos parte dunha cadea na que Xosé Luís Franco Grande constituía un dos elos máis rexos», expresou Boullón.
Na súa disertación, a filóloga tamén quixo centrarse na onomástica, a especialidade pola que é recoñecida como unha investigadora de referencia, recordando que os nomes, tanto os que fan referencia ás persoas como aos lugares, forman parte do patrimonio inmaterial, «da nosa biografía xeográfica, individual, familiar e colectiva».
En relación aos nomes propios, para Boullón está ben claro que, cando os proxenitores escollen un nome, tamén están reproducindo certas estruturas e significados sociais, mesmo comprometéndose activamente na creación de novas formas. Por este motivo, criticou a «despersonalización burocrática e a indefensión ante o poder».
Neste sentido, para a académica o nome é un dos aspectos que contribúen á visualización da identidade, porque «unha escolla implica asumir unha posición con respecto aos atributos e valores que se asocian a el».
A tradicional resposta ao discurso de ingreso tivo lugar a cargo de Ramón Lorenzo, tamén membro de número da academia, que quixo facer un percorrido polos méritos de Boullón, así como lembrar a etapa na que ela era «unha das miñas alumnas preferidas e coa que teño compartido horas de traballo».
Para Lorenzo, a filóloga estaba destinada a especializarse na toponimia «por unha razón fundamental: ela naceu na Pobra e viviu moi de preto a polémica sobre a designación do seu lugar de orixe, na que participou activamente».
Aplausos e flores
«É unha honra para a academia avanzar no proceso de igualdade», remataba Lorenzo o seu discurso, tan ovacionado polo público asistente como previamente fora o de Boullón. Os aplausos elevaron o ton durante a entrega á académica do diploma e da medalla da corporación, outorgada polo presidente da Real Academia Galega, Víctor Freixanes.
Este último tamén aproveitou para agradecer a presenza do secretario xeral de Política Lingüística, Valentín García, e do reitor da USC, Antonio López.
Unha vez levantada a sesión extraordinaria da corporación, o alcalde da Pobra, Xosé Lois Piñeiro, acompañado pola concelleira de cultura, Patricia Lojo, subiron ao escenario para facer entrega dun ramo de flores en recoñecemento dos méritos acadados por Boullón.
