Por músico!


Hai xa ben anos decidín dedicarme profesionalmente á música a pesar de estudar algo totalmente diferente. Antes de tomar esa decisión, ben meditada, estiven unha chea de tempo exercendo de xeito afeccionado, pero con moita paixón, o mesmo oficio. A música folk á que me dedico non é precisamente a que sona con máis frecuencia nos medios de comunicación, nin moito menos, aínda que si é moi popular e ten un público que garda unha certa fidelidade o cal fai que ese sexa un valor moi importante.

Pode parecer un tópico dicir que fóra de Galicia é moi valorada e recoñecida mais é unha certeza e grazas a iso, Luar Na Lubre sigue con boa saúde despois de máis de 30 anos da súa creación, con 19 traballos discográficos e máis de 1500 concertos realizados en máis de 30 países diferentes. Á hora de profesionalizármonos, a finais dos anos 90, constituímos unha empresa e cotizamos como autónomos o que por lei nos corresponde e cos seus máis e seus menos, aí­ estamos, inscritos nun epígrafe un pouco difuso que moitas veces nos deixa nun limbo administrativo enmarañado pero non temos nada mellor e é co temos que terzar. Agora, cun disco a piques de saír e cunha xira impresionante que nos levaría por moitos lugares de Galicia, España e do mundo, aparece de súpeto este virus sibilino e fai que todo o que tiñamos proxectado a corto medio prazo haxa que suspendelo ou adialo sine die e que con moi pouco tempo teñamos que pornos a mirar alternativas de viabilidade para facer fronte a toda esta desfeita.

E así estamos, agardando a que se clarifiquen algo as cousas, ver que camiños tomar e cal é a alternativa que temos para encarar este estraño momento que se nos cruzou na vida. Vivimos nun estado caracterizado por non tratar especialmente ben a súa cultura en termos xerais e a pesar de que todo son palmadiñas no lombo e boas palabras de ánimo pouco máis temos. Estou convencido de que non é un problema puramente administrativo pero nestes momentos difíciles é cando en realidade deberían de estar como o fan noutros países que admiramos por determinadas maneiras de xestionar e onde a cultura é un ben prezado. Toca reinventarse unha vez mais, por músico!

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
25 votos
Comentarios

Por músico!