Valle-Inclán


Don Ramón María del Valle-Inclán está a triunfar no Teatro María Guerrero de Madrid con Luces de bohemia, nunha coidada posta en escena de Alfredo Sanzol que acredita a riqueza dramática da obra do xenial autor galego. Porque isto é o primeiro que hai que afirmar sen dúbidas, agora que xa sabemos que foron as súas obras as que nos situaron (e seguen a situarnos) na primeira liña das vangardas escénicas mundiais.

A vixencia do teatro de Valle-Inclán é tan real e tan firme que aínda hoxe representa unha indiscutible dianteira en todo o mundo. Cabe dicir que a dramaturxia do século XX ten uns nomes propios xa indiscutibles e principais: Valle-Inclán, Bertolt Brecht, Samuel Beckett e Eugène Ionesco (e, se se quere -desde unha perspectiva filosófica-, o Jean-Paul Sartre de Huis Clos e o Albert Camus de Os xustos).

De todos eles, cabe dicir que Valle-Inclán é o que ofrece unha visión máis directa e descarnada da condición humana. Por iso quizais sorprenda que a primeira montaxe internacional da súa Divinas palabras a fixese o director sueco Ingmar Bergman en 1950. A partir de aí todo empezou a ser máis fácil: sucedéronse as montaxes en Madrid, tres en París e despois tamén nos EUA e noutros países.

Ben se pode dicir, pois, que na segunda metade do século XX o teatro de don Ramón xa cabalgaba á fronte da grande dramaturxia, cunha vitalidade e unha orixinalidade sorprendentes... Mágoa que isto só ocorrese despois da súa morte!

«Falloume a época», laiábase, porque así o sentía, e sabía que isto só podía ter amaño co paso do tempo. Pero el xa non estaría neste mundo para velo, porque sentía que tiña «a estrela perdida». A estrela da harmonía sociocultural, que fai coincidir a creación crítica coa formación cultural e a sensibilidade dun pobo. Isto chegou despois, cando el xa non estaba entre nós. Finou en Santiago de Compostela o 6 de xaneiro de 1936, nas vésperas dunha espantosa Guerra Civil. E no seu enterro compareceu, abrazado ao ataúde, o grande Castelao, como acreditou Domingo García-Sabell e como recolle tamén Ángel Peláez no seu bo documental Valle-Inclán: a vixencia dun xenio.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
7 votos
Comentarios

Valle-Inclán