Belas Artes esixe protección para 13 edificios do movemento moderno

Demanda á Xunta a súa inclusión no catálogo de bens culturais


Redacción / La voz

A arquitectura de mediados do século XX non ten a protección axeitada. O paso do tempo aínda non a cubriu coa súa pátina lexitimadora. Así o pensa a Academia Galega de Belas Artes A Nosa Señora do Rosario, que decidiu solicitar á Xunta que tome cartas na defensa deste patrimomio. En particular, se refire a Academia ao movemento moderno (comprendido entre os anos 1925 e 1965), do que presenta á Administración autónoma unha listaxe de trece edificios para a súa inclusión no catálogo de bens culturais. A selección, xa elaborada pola delegación ibérica da Fundación Docomomo (Documentation and Conservation of buildings, sites and neighbourhoods of the Modern Movement), integra barrios, conventos, colexios, fábricas, igrexas, lonxas, edificios residenciais, equipamentos universitarios e ata un encoro. O vicepresidente da Academia, o arquitecto Celestino García Braña, enxalzou a importancia destas obras: «Teñen un valor cultural de primeira magnitude, igual que unha igrexa románica ou un pazo do século XIX. Para entendernos, estamos na época do formigón, o vidro e o ferro, así como na da funcionalidade e a industria».

García Braña anota que o movemento moderno pode contabilizar preto de 200 instalacións relevantes en Galicia, das que «unhas setenta ou oitenta» son fitos especialmente sinalados. A nómina que lle achegan á Xunta, matiza, só fala das 13 que o informe de Docomomo sitúa na comunidade das 256 que localiza en toda España.

As 13 arquitecturas elixidas son: o mercado de Santo Agostiño (1932), o poboado mineiro de Fontao (1954), a fábrica Cross (1954), o edificio residencial Plastibar (1957), o encoro de Belesar (1959), a lonxa coruñesa do Gran Sol (1960), a igrexa da Cruz do Incio (1960), a Universidade Laboral (1961), a igrexa parroquial Nosa Señora das Neves (1962), o barrio das Flores (1965), o colexio vigués Saladino Cortizo (1965), o convento ourensán das Carmelitas Descalzas (1965) e o colexio dos Milagros de Baños de Molgas (1965).

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Tags

Belas Artes esixe protección para 13 edificios do movemento moderno