O dúo representa esta tarde no Teatro Colón a obra «Bobas & galegas», escrita e dirixida por Quico Cadaval
17 sep 2016 . Actualizado a las 05:00 h.Mofa e Befa (Evaristo Calvo e Víctor Mosqueira) viaxan ata o Século de Ouro da literatura española a través dun texto de Quico Cadaval. Onte tivemos a oportunidade de velos sobre o escenario do Teatro Colón, e hoxe repiten función ás 20.30 horas (entradas a 8 e 12 euros). Mosqueira da as claves da obra.
-¿Mofa e Befa facendo teatro clásico?
-Recitamos textos en verso de varios autores como Lope de Vega, Calderón, Quevedo... Textos do Século de Ouro. Pero é unha mestura. É unha peza que se vai interrompendo continuamente con intervencións nosas, recitados...
-¿Pero segue sendo Mofa e Befa? ¿Hai humor?
-Si, claro que é unha obra de humor. Desmontamos moitos tópicos sobre os galegos. Rimos de nós mesmos, coma sempre. É realmente divertida. E moi instrutiva tamén.
-O texto é de Cándido Pazó.
-Xurdiu para o Festival de Almagro, para a edición do 2014, que abrimos o festival. E gustou moito, a pesar do atrevemento. Nós estiveramos xa anos antes con Shakespeare para ignorantes.
-¿E qué ten que ver o teatro clásico cos galegos?
-No teatro clásico moitos dos criados son galegos. Así que sempre estivemos presentes nas obras clásicas, aínda que fose como criados.
-Mofa e Befa sodes a parella de feito máis duradeira dos escenarios galegos. ¿Canto tempo fai daquela curtametraxe, «A gran liquidación»?
-Iso é do ano 93, nada menos. E levábamos xuntos dende un ano antes, así que imos facer pronto o 25.º aniversario. Ímolo levando, polo de agora funciona.