«Este ano, como o anterior, batemos o récord de inscritos»

ATLETISMO | Vimianzo acollerá este domingo pola mañá unha nova edición da súa carreira popular. Fala o técnico Víctor Santos

T. Longueira

Vimianzo acollerá este domingo pola mañá unha nova edición da súa carreira popular, valedoira como sempre, para o circuíto Correndo pola Costa da Morte. Víctor Santos, técnico de Deportes do Concello de Vimianzo, analizou onte en Radio Voz Bergantiños os pormenores desta gran cita do atletismo.

-Xa está todo listo para esta proba, fixada inicialmente para outras datas.

-Pois si. No calendario orixinal estaba fixada para o 28 de abril, pero a raíz da convocatoria das eleccións nacionais vímonos na obriga de adiantar a data da celebración da proba.

-Influíu este cambio na cifra de deportistas inscritos?

-Batemos de novo o récord de inscricións. O pasado xa o batéramos, e agora, tamén. O pasado ano foron 938 anotados e este ano, 977. Agora hai que ver se estes bos datos reflicten logo na cifra de participantes.

-Por que?

-Hai que ter en conta que nas cifras de inscritos hai que contabilizar aqueles que xa se anotaron para todo o circuíto. É dicir, hai unha serie de atletas que están anotados para todas as carreiras e eles elixen ás que van. Teñen que facer un mínimo de sete probas, polo tanto, teñen marxe para poder acudir a unha ou outra proba.

-Que me pode dicir do percorrido deste domingo de Vimianzo?

-O destacable da proba é que se trata dun circuíto homologado pola Federación Española de Atletismo. É un percorrido bastante rápido, moi plano e moi esixente, porque a xente que vaia pelexar pola vitoria non terá un só tramo onde poida baixar o pistón por así dicilo. Terán que ir a tope en todo o percorrido se queren facer marca e non hai desniveis que te permitan cambiar de ritmo.

-Xa teñen definidos os horarios?

-A proba raíña, a 10k, arrancará ás once da mañá e despois, ás 12.15 horas, correrase a 3K contra o cancro. Ás 12.17 horas tomarán a saída os infantís, cadetes e xuvenís. Ás 12.50 horas sairán os alevíns, as 13.00 horas, os benxamíns e ás 13.10 horas, os pitufos.

-Cal é a previsión de tempo para este domingo?

-En principio dan moi bo tempo, por iso esperamos una alta participación. Tampouco sería desexable moita calor e para evitar os seus efectos habilitaremos un punto de refrixerio.

-Faltará á proba unha das clásicas, Teresa Castro.

-Si, atópase no campionato do mundo de Polonia e, ademais, colleitando uns moi bos éxitos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Este ano, como o anterior, batemos o récord de inscritos»