Antes do seu inicio darase a coñecer o fallo da 20.ª edición do certame de poesía erótica Illas Sisargas
09 nov 2025 . Actualizado a las 05:00 h.A localidade de Malpica acollerá o vindeiro sábado 22 de novembro unha nova edición da Cea das Letras: será ás 20.00 horas, na Casa do Pescador, unha auténtica festa da poesía e, como referencian dende o consistorio, «unha das citas literarias máis queridas».
E é que durante o acto darase a coñecer o fallo do 20.º certame de poesía erótica Illas Sisargas, singular no panorama literario galego e promovido dende a asociación Caldeirón e o Concello malpicán, dende a súa área de Educación, Cultura, Patrimonio, Deporte e Turismo. Unha vez se coñeza o gañador ou gañadora, terá lugar a tradicional cea.
Acudir a esta ten un custe de 20 euros e as reservas poden facerse no 649 507 208 ou ben no 981 707 104. Queda pouco, pois, para coñecer quen relevará este 2025 ao nome do vigués Francisco Fernández Davila, escritor e enxeñeiro: el foi quen gañou na pasada edición deste concurso co traballo titulado Atravesar o don.