«Co Xeoparque trátase de protexer o que temos, que non é pouco»

Considera que, convenientemente xestionado, pode axudar ao desenvolvemento local da Costa da Morte


carballo / la vo

Con sede en Laxe quedou constituída este pasado luns 17 a Asociación para a Xestión do Xeoparque Costa da Morte, que non só pretende dar continuidade ao traballo do científico Isidro Parga Pondal, senón tamén perseguir o desenvolvemento sostible do territorio deste Xeoparque, con especial interese nos valores xeolóxicos, naturais e culturais. José Manuel Pato, tamén delegado en Galicia da Real Liga Naval Española, é o presidente da agrupación, á que se sumou tamén Eduardo Pardo de Guevara y Valdés, director do Instituto de Estudos Galegos Padre Sarmiento, así como delegado institucional do Consello Superior de Investigacións Científicas (CSIC) en Galicia. Pato falou en Radio Voz Bergantiños.

-Xeoparque Costa da Morte. Cóntenos, ¿en que consiste isto?

-O Xeoparque Costa da Morte naceu o 17 do sete do 2017 e nace en Laxe porque temos que recordar que neste municipio naceu Isidro Parga Pondal, o maior xeólogo que deu Galicia, definidor das grandes unidades xeolóxicas desta comunidade e, ademais, autor do Mapa Petrográfico Estrutural de Galicia. Aquí, fundado e dirixido por el, tivo o seu Laboratorio Xeolóxico de Laxe. A asociación pretende ese desenvolvemento sostible do territorio mediante accións e a posta en marcha de actividades cuxo valor redunden en beneficio das persoas que habitan ese territorio. Isto, fundamentalmente, é levantar economicamente a zona que atinxe ao Xeoparque. ¿Como? Potenciando as habilidades e as cousas que temos na Costa da Morte para crear riqueza, preservando o patrimonio xeolóxico. En ningún caso é unha área restritiva, como pode ser un parque natural, onde non se poden cortar certas especies ou plantar outras. Isto non restrinxe nada. Simplemente se trata de protexer o que temos, que non é pouco.

-¿E esa acumulación de setes na que naceu ten algunha razón?

-Non, é algo máis ben simbólico, por ter unha data significativa.

-¿Quen o acompaña nesta andaina do Xeoparque?

-Acómpañame un grupo de persoas de moita relevancia profesional e social, afortunadamente. O menos importante de todos eles son eu. Entre outros temos a Antón Castro, de Muxía, quen foi número dous do Ministerio de Cultura, un home que sempre está disposto a axudar, licenciado en Historia da Arte... Sobre todo é un home que coñece perfectamente a Costa da Morte e está identificado cos valores que temos aquí. Está tamén o xeólogo e catedrático Juan Ramón Vidal Romaní, cun larguísimo currículo, e a quen cando lle presentamos o proxecto ilusionoulle moito. El, director do Instituto Universitario de Xeoloxía Isidro Parga Pondal, é o vicepresidente e pedra angular deste proxecto, porque todo o que imos facer está intrinsecamente relacionado coa xeoloxía, o fío condutor de todo o demais. Tamén temos ao arquitecto Antón García Abril, con casa preto de Laxe; a Miguel San Claudio, máis coñecido entre nós porque fixo moitos estudos do patrimonio subacuático... Todos os demais directivos teñen asemade un currículo importante, pero o mellor é que están todos dispostos a traballar e a colaborar para que este proxecto acade o que pretendemos, que é un selo da Unesco para a Costa da Morte.

-¿E por que agora?

-Isto foi un proxecto que xa ideei hai algúns anos, cando descubrín o valor que tiñan os xeoparques noutras partes do mundo. En España hai agora mesmo once. Pareceume unha boa idea. Estíveno madurando e foi hai seis meses cando me puxen a traballar cada día ata conseguir este resultado do 17 do sete do 2017.

-¿Cal diría que é o principal obxectivo deste Xeoparque?

-Penso que o principal obxectivo deste Xeoparque, e de todos, é fomentar a iniciativa privada. Este é un recurso que, convenientemente xestionado, pode contribuír ao desenvolvemento local, aproveitando as sinerxías dunha grande rede mundial como é a Unesco.

-¿Como visualizan os primeiros pasos para conseguir tal fin?

-Dunha maneira moi sinxela. Vidal Romaní está preparando unha documentación que require a organización en España; posteriormente será levada a Europa e, por último, á Unesco. É fundamental a redacción deste proxecto. Despois, os demais aportarán tamén proxectos. Estamos abertos a novas incorporacións e adhesións ao Xeoparque. De feito, xa houbo varias asociacións e particulares que se interesaron e contactaron con info@xeoparquecostadamorte.gal para solicitar información. En próximos días e semanas teremos xuntanzas.

-¿Cre que é suficientemente coñecido o patrimonio xeolóxico que temos nesta comarca?

-Bueno... Espero que a partir desta conversa sexa máis coñecido, pero tamén é certo que coas accións que estamos preparando se dará máis a coñecer. Cantas máis persoas, asociacións e concellos haxa implicados, mellor para todos. Moitos proxectos poden ter acollida dentro do Xeoparque Costa da Morte.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«Co Xeoparque trátase de protexer o que temos, que non é pouco»