ATLETAS DO ATLÁNTICO | «Os meus lugares favoritos desta zona son a praia da Insuela e Corcubión», di José Manuel Bermúdez Piñeiro. Veciño de O Pindo, é xogador do Cee.
17 jun 2019 . Actualizado a las 05:00 h.José Manuel Bermúdez Piñeiro (O Pindo, 1998), coñecido por Chema, ten 21 anos e é xogador do Cee, equipo que milita na Segunda Autonómica do grupo da Costa. Leva toda a vida xogando ao fútbol: «Comecei no Cee cando tiña apenas 6 anos. Logo fun para o Carnota, pero cando desapareceron as escolas de base marchei para o Soneira, e de alí, regresei ao Cee». Defensa central de 1,84 de altura, defínese como un xogador de forza, ao que lle gusta saír co balón controlado dende atrás.
-Cando xoga, pensa que pode chegar algo máis arriba no mundo do fútbol?
-Considérome moi competitivo, ao que non lle gusta nada perder, como é lóxico, pero tampouco tomo o fútbol como o fin do mundo. Non me gusta perder as formas, gústame xogar e pasalo ben, que tamén é importante. En todo caso, no que a formación se refire, nesta comarca hai un problema importante: creo que falla a promoción dos rapaces. Coñezo a xogadores moi bos, aos que non se lles dá a oportunidade de destacar. Nisto do fútbol tamén hai un factor chamado sorte, que aquí, polo que sexa, non se soe dar.
-De que equipo é seguidor vostede?
-Do Real Madrid.
-Cando xoga, ou cando comezou, cales foron as súas referencias?
-Gustame a forza e o carácter que lle imprime ao equipo Sergio Ramos, pero tamén me fixo na calidade de xogadores da clase de Isco ou Iniesta.
-Como aborda, se xa o fixo, o seu futuro no mundo do fútbol afeccionado?
-Penso en pasalo ben, xogar e competir, pero o meu futuro pasa por formarme.
-Xa ten decidido onde e como?
-Agora mesmo estou facendo un ciclo de Formación Profesional de deseño de produtos mecánicos en Vigo e para o vindeiro curso quero facer unha carreira relacionada co deseño técnico.
-A que lle gustaría dedicarse no futuro cando remate os seus estudos?
-Gústame o debuxo, creo que se me dá moi ben. Tamén me gusta todo o que ten que ver co deseño. Tal vez, se puidera, faría algo relacionado co deseño de mobles, habitacións...
-Ademais do debuxo, cales son as súas outras afeccións?
-Todo o que ten que ver cos deportes do mar: a pesca a natación... E tamén me gusta cociñar. Polo de agora vou co básico, pero son dos que vou aprendendo rápido. Falo coa miña nai [Marisol], facemos propostas e vou probando e practicando, e a verdade, e polo que fixen ata o de agora, non se me dá nada mal. O que si levo mal é o de limpar cando mancho [ri]. Prefiro cociñar antes que limpar, iso seguro.
-Ten algunha afección máis?
-Ler, sobre todo os temas relacionados coa mitoloxía e a antigüidade.
-Di que lle gusta a pesca. Dígame un lugar ao que vai de forma habitual.
-Detrás da miña casa, no Pindo. Sempre que podo vou para alí.
-Se tivera que escoller un par de sitios para gozar das vistas, cales escollería?
-Un deles sería sen dúbida a praia da Insuela, preto de Caldebarcos [Carnota]. E se falamos da zona de Fisterra, gústame a vila de Corcubión, ten unhas casas mariñeiras fermosas, é un pobo moi bonito.
-Polo que vexo gústalle todo o que ten co mar.
-Non é de agora, é de sempre. Teño que vivir moi preto do mar, senón agoníome, pásoo moi mal. O mar reláxame e sérveme para desconectar.