Peóns ao camiño, de novo, coa asociación Cormoráns, en Cabana

A asociación cultural e deportiva Cormoráns, co apoio do Concello de Cabana e a Deputación da Coruña, organizou para este domingo 2 de novembro a terceira edición de Peóns ao camiño. Será na Casa do Pendón, entre as 16.00 e as 20.00 horas, con varios concursos, estes que seguen: 

• Torneo de buxainas. Inscrición previa ou ben na propia xornada. Dende as 16.00, clase maxistral de habilidades co mestre Luís Miguel Ramas e o campión internacional Omar Jonathan Pule (México). Dende as 17.00, torneo. Clasificación por categorías de idade. 
• Buxainas terroríficas. Premio ao debuxo do peón ou buxaina que máis medo inspire. Pode empregarse calquera técnica e tamén haberá clasificación por categorías de idade. 
• Poemas xiroscópicos. Poemas que xiren arredor do xogo e as emocións que este esperta, sen límite algún de versos e igualmente clasificación por idades. 
• Buxaicontos. Relatos breves nos que o fío condutor sexa o xogo e todo o que o arrodea. Premios en función das idades.

Aqueles que desexen participar ou obter máis información, así como enviar a súa creación, poden contactar co 626 62 23 97 (Trini) ou co correo acdcormoranscabana2023@gmail.com. O prazo está aberto ata as 14.00 horas desde domingo. Bule, que estás a tempo de participar! 

---

---

---