Alejandro Gándara, tralo Premio Mestre Mateo: «É un aval ao noso traballo e á nosa forma de facer as cousas»

Conta Alejandro Gándara Porteiro que el pensaba que non estaba nervioso. Case que nin o día antes, pero outra cousa foi chegar alí, ao auditorio Fuxan os Ventos de Lugo, para tomar parte na XXIV gala de entrega dos Premios Mestre Mateo, a gran noite do audiovisual galego. Todo era expectación. Baiés do 1993, e tamén en parte carballés, Alejandro codirixe xunto coa estradense Ariadna Silva o filme 360 curvas. Estaba nominado na categoría de Mellor Documental xunto cos traballos Ao son da nova regueifa, Deuses de pedra e O silencio herdado, e acabou facéndose co galardón, que por tanto chega con el para a Costa da Morte: «Era un apartado moi disputado, a verdade, quizais das categorías nas que estaba menos claro, polo que alí nos dicían». Sabendo da traxectoria das outras propostas, con nomes ben coñecidos pola Academia, supúxolles aínda máis «sorpresa e alegría» subir ao escenario: «Gañar en Lugo, ademais, foi moi especial. Estabamos representando alí á Fonsagrada». 

Representando, máis concretamente, á forza, á unión, dignidade e espírito colectivo dun territorio: 360 curvas é como se lle chama á estrada que separa Lugo da Fonsagrada, «unha estrada ben complicada que escollemos como símbolo da película porque conecta moi ben pasado e presente, diso vai o filme», explicaba semanas atrás en Radio Voz. Houbo na Fonsagrada, nos anos 90, as chamadas movidas, protestas veciñais contra o desmantelamento de servizos e o abandono institucional do rural. Unha loita pioneira pola supervivencia. Unha historia moi concreta, pero que se pode extrapolar a calquera punto nesas circunstancias, como tamén incidiu Ariadna Silva logo de saberse gañadores do Mestre Mateo. «É unha historia que nace mesmamente do pobo», afirmou.

Estreado no Festival de Cine Internacional de Xixón, o documental pasou xa por diversos festivais e tivo importante presenza nas salas de cine, mesmo chegando a colgar o cartel de completo. Hai unhas semanas proxectouse no Casino de Carballo, co propio Gándara Porteiro participando dun coloquio, e xustamente este sábado 28 de marzo haberá ocasión de gozar a peza no auditorio de Baio (20.00 horas): 360 curvas dará inicio ciclo cultural Mulleres e territorio, impulsado polo Concello de Zas, dende o que veñen de facer públicos os seus parabéns. Moi especialmente, a Alejandro, director por certo dos Premios Fouciño, festival audiovisual baiés. «Un recoñecemento moi importante ao seu traballo e ao talento que temos no noso concello, que segue destacando a nivel galego», publicou nas súas redes o consistorio. 

Os dous directores do documental galardoado están felices: «Imos pouco a pouco. Facer cine é complicado en xeral, e máis aínda facer películas documentais que teñan tanta repercusión e vaian a tantas salas de cine como xa ten ido 360 curvas. Agardamos agora que isto sexa un impulso para continuar a xira, para seguir indo a máis salas e mesmo para volver a onde xa fomos, sabendo que é complicado mover unha peza así. Que che dean un premio como este Mestre Mateo é un aval ao noso traballo e á nosa forma de facer as cousas», sopesa o baiés. E como é esa forma? «Traballar dende o coidado, prestando atención a historias que están un pouco esquecidas, pero que son moi potentes. Na nosa memoria recente hai un pouco de desmemoria, mais temos historias moi chulas, pequeniñas, que feitas dende o cariño e cunha certa intención de darlles o lugar que realmente merecen, pois van derivando en cousas coma esta. Tamén nos Premios Fouciño incidimos sempre nisto mesmo, en animar á xente co cinema de proximidade», precisa Gándara Porteiro. Cine social, neste caso. Non fai falta saír de Galicia para atopar material a centos. Boa proba diso é outro traballo de Alejandro, codirixido nese caso con Olaia Tubío: Dorothé na Vila. 

ESTREA DE CURTA ESTA PRÓXIMA SEMANA

Este domingo a mediodía o equipo de 360 curvas recuperábase dunha gran festa do audiovisual: «Nós levamos moi pouco nisto, somos mesmo un pouco outsiders», ri Alejandro. Avanza, por certo, que esta semana vindeira estreará unha curta ou pequeno documental rodada na Costa da Morte e dirixida por el: A costa e os castelos. Xa fixeran avance nos Premios Fouciño 2025, mais o venres 27 haberá ocasión de vela nas Torres do Allo (Zas) e o sábado 28 no Sol Espazo Artístico (Carballo), aos mandos de Isa Bermúdez. A partir do luns, máis datos, mais por se queren tomar nota da sinopse: «Unha viaxe pola Costa da Morte a través dos seus castelos, torres e pazos, explorando as historias do pasado e o presente destes lugares, para compoñer un relato que combina a investigación histórica cunha ollada curiosa cara a nosa relación co patrimonio». ¡A seguir creando!

---

---

---