Escribe Valentín García, director xeral de Política Linguistica | Os galegos desta zona xogan un rol fundamental na permanencia da lingua
21 feb 2021 . Actualizado a las 05:00 h.
No mundo conviven arredor dunhas sete mil linguas. Algunhas contan con milleiros de falantes, mentres que outras non chegan á centena. Por iso, hoxe, e dende que así o declarou a Unesco no ano 1999, celebramos o Día Internacional da Lingua Materna na defensa da diversidade lingüística. Para poñernos en situación, a lingua materna é, segundo recolle o Instituto Cervantes, a primeira lingua que aprende un ser humano e que normalmente se converte no seu instrumento natural de pensamento e comunicación.
En Galicia, tal e como indica o artigo 5 do Estatuto de Autonomía, a lingua propia é o galego, pero tanto o galego como o castelán son idiomas oficiais, de modo que todos temos o dereito de coñecelos e usalos non podendo ser discriminados por razón da lingua. Así, segundo os últimos datos publicados polo Instituto Galego de Estatística (IGE) no ano 2018, o 30,57 % da poboación de Galicia fala sempre en galego fronte un 24,40 % que o fai sempre en castelán. En canto á lingua materna, o 42,19 % dos galegos aprende a falar en galego, mentres que un 31,72 % o fai en castelán, e un 23,68 % aprende nas dúas linguas. Deste xeito, segundo amosan os datos, a lingua materna dos galegos e galegas segue a ser, primordialmente, o galego.
E que papel teñen os bergantiñáns na subsistencia do galego como lingua materna? Pois un crucial, porque se profundizamos un pouco máis atopamos que a Costa da Morte, na que encadramos Bergantiños, é a segunda comarca de toda a comunidade galega con maior porcentaxe de poboación que fala habitualmente sempre no idioma galego, ou máis galego ca en castelán, cun 92,43 % dos seus habitantes. Só estarían por diante, e cunha diferenza apenas perceptible, as áreas da Coruña suroriental. En canto os galegos aos que os seus pais e nais lles falaban sempre en galego ou máis galego ca castelán, Bergantiños, e o resto da Costa da Morte, levan a medalla de ouro cun 95,08 % da súa poboación. Non hai dúbida de que esta comarca xoga un rol fundamental na permanencia e legado da lingua do noso país.
