«Vai votar que non che custa, na mañá ou na tardiña, e non estragues o voto, vota con cabeciña», di Lupe Blanco
10 nov 2019 . Actualizado a las 05:00 h.Neste domingo regueifo,
acabouse o de pensar,
levanta o cu da cama
que hoxe hai que ir votar.
Non vale estar cabreada,
tes a obriga de ir votar
despois do que hai que oír,
está na túa man cambiar.
Eu vou dar unhas pautiñas,
como se algo soubera,
que, vendo o panorama,
disto opina calquera.
Se queres subir impostos
e prefires recortar,
mirando polo empresario,
tes partido a quen votar.
Se buscas a igualdade
e a educación cambiar,
contra toda violencia,
tes partido a quen votar.
Se queres ser progresista
e tirar por exhumar,
sen centos cincuenta e cinco,
tes partido a quen votar.
Tamén podes ir de progre,
mirando con quen pactar,
e tirando para a dereita
tes partido a quen votar.
E se che interesa Galicia,
e crees que é mellorar,
se pensas que desta vai
tes partido a quen votar.
Pero se vas co pasado
e con racismo de fondo,
sen ningunha liberdade,
terás partido abondo.
Espero que che axudara,
non quero ningunha guerra,
que se non quedou moi claro
votamos na primavera.
Que unha cousa queda clara,
neste día non nos mexan,
hoxe falamos nós
e que fagan o que vexan.
Vai votar que non che custa,
na mañá ou na tardiña,
e non estragues o voto,
vota con cabeciña.