«A mostra ten como base a tradición oral»

Inaugurada no Museo de Arte Contemporánea a exposición «Corme. Territorio Sobre Natural»: son 8 paneis. Fala Ana Filgueira, experta en arqueoloxía e responsable de dirección, textos, fotografías e composición 


Carballo / La Voz

Quedou inaugurada onte no Museo de Arte Contemporánea de Corme a exposición «Corme. Territorio Sobre Natural», o resultado dun proxecto de cartografía mítica dirixido pola especialista en arqueoloxía Ana Isabel Filgueiras Rei, e impulsado dende a concellaría de Patrimonio, tendo como ámbito xeográfico as parroquias de Nosa Señora dos Remedios, San Adrián de Corme, San Xián de Brantuas e San Xoán de Niñóns. Foi Ana quen falou da mostra para Radio Voz.

-Que se pode ver nela?

-O resultado dun traballo de campo que se desenvolveu durante o verán pasado, e parte do inverno. Tivo como fase fundamental a recollida da tradición oral, a historia contada dende a xente, dende o seu ritmo vital, memoria, lembranzas e coñecemento do lugar. Incorpora, por suposto, todo o patrimonio do pasado, arqueolóxico, etnográfico... todo o valor que ten en si unha cultura moi particular como é a desta zona da Costa da Morte.

-Oito paneis que van abordando moitos aspectos.

-Si, exacto. É difícil expresalo todo así dun xeito gráfico, pero é a forma máis directa. É, tamén, un xeito de agradecer a todas esas persoas, porque a súa información esta aí, a parte dalgunha outra erudita: esta exposición está orientada a expresar o que nos comunica a tradición oral. Os oito paneis temáticos comezan pola Prehistoria: hai cartografía e mapas, pero van incorporadas lendas e tradicións relacionadas, por exemplo, cos restos arqueolóxicos que ten Corme e coa existencia alí dunha pedrafita ou dun menhir, algo singular porque en Galicia está desaparecido moito deste patrimonio. Os outros paneis van dende o coñecemento do que é habitar, a como se aborda a morte, ou cuestións cerimoniais e de relixiosidade popular, crenzas, patrimonio natural... Todo o sobrenatural, o menos visible, o máis máxico, de aí que lle chamemos «sobre natural», nos dous sentidos.

-Como foron eses meses de estudo ata chegar aquí?

-Intensivos, porque require o contacto directo: para coñecer un territorio tes que andalo e camiñalo. Está a base que sustenta o territorio, as persoas que o habitan, especialmente as maiores, que son as que teñen ese saber transmitido durante milenios, os últimos depositarios. De aí a emerxencia do proxecto, no que tamén se recolleu toda a toponimia, microtoponomia e talasonimia (os nomes do mar), para que alomenos quedaron rexistradas sobre cartografías e mapas. Sen garantir a súa permanencia perdemos unha enciclopedia do que foi o vivir neste lugar. En Galicia temos millóns de topónimos, é un patrimonio único no mundo e esta desaparecendo.

-Dirección, textos, fotografías e composición correspóndelle a vostede e a Antón Bouzas. Satisfeitos co resultado?

-Completamente. É un esforzo, pero tamén unha aprendizaxe. Levo trinta anos nisto e para min é un privilexio, un enriquecemento, primeiro persoal, polas relacións humanas. Teño que destacar, e especialmente en Corme, a colaboración, o entusiasmo da xente, a súa disposición, o orgullo que senten do que teñen. Tamén os mozos: teñen unha enerxía e unha intención de mandar isto para o mundo, son conscientes do que teñen. Houbo colaboración cos colexios, fixéronse guías, visitas guiadas con xente de fóra... Todo iso conseguiuse e estamos contentos de poder ter aportado algo.

-Ata cando se poderá ver?

-En principio até o verán. Hai a iniciativa de que sexa itinerante, poñéndose en contacto coa concellaría de Patrimonio.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«A mostra ten como base a tradición oral»