Bieito Romero é un histórico de Luar na Lubre, un grupo que, malia a crise, ten uns 40 concertos este verán. Aínda así, Romero aproveita o «tempo de lecer» entre un e outro erguéndose cedo, «con moita enerxía». A súa relación ca Costa da Morte vén de atrás «porque din clases de gaita en Malpica e, como amante da etnografía, adoro a zona». A nivel musical, nos discos de Luar na Lubre sempre hai referencias á zona (dolmen de Dombate, o faro do Roncudo, o Ara Solis de Fisterra ou as dunas de Baldaio). Tamén está moi ligado á Carballeira de Zas e vai pescar a Corme e a Malpica. «Máis ben son mollador de miñoca», di, e que ten unha colección «dunhas mil boias».
-Comida e bebida.
-Ensalada completa e sidra.
-Praia favorita.
-Baldaio (Carballo).
-Non sae da casa sen...
-Un bolsiño, que é unha característica da miña imaxe.
-O mellor e o peor do día.
-O mellor son as mañás. O peor, o sono do mediodía.
-¿Romarías ou verbenas?
-Eu son moi de noite, aínda que as de romarías tamén me gustan.
-Gasta pista con...
-Non son bailador e non coñezo as cancións do verán.
-No verán infórmase con...
-A Internet é unha boa fonte de información.
-A viaxe deste verán.
-A Frigiliana, a 50 quilómetros de Málaga, na serra.