Fala o autor do polémico audio do Mazaricos: «Estou tranquilo porque non fixen nada»

Iván Baña Grille (Mazaricos, 1998) vive o seu primeiro ano no equipo sénior da súa vila, logo de pasar por outros clubs de fútbol da zona como as escolas Luís Calvo Sanz de Carballo, o Dubra, o Dumbría e o Victoria coruñés. Iniciouse neste deporte dende moi novo na propia localidade e desempéñase como porteiro. Este martes fixo as primeiras declaracións a La Voz sobre o polémico audio que enviou a un xogador do Ponteceso e que deixou no aire un posible amaño dun partido disputado o pasado día 13.

—Antes de nada, como está tras a polémica xurdida a raíz dun audio seu?

—Non foi nada agradable nin fácil de levar pola repercusión que tivo. Estiven moi amolado, pero á vez, tranquilo porque sabía que non fixera nada. Agora aínda o estou máis toda vez que, dende o club, nos informamos para poder publicar as mensaxes daquela conversa e que demostran que nada houbo. Queremos que se saiba a verdade canto antes para que isto acabe. En ningún caso pensei que puidera ter a repercusión que tivo porque eu sabía perfectamente que a outra persoa estaba vendo que non ía en serio. O que pasa é que, sacado de contexto... Entendo que a xente puidera pensar mal, pero tamén creo que, sen todas as probas, non se poden facer acusacións tan graves como fixeron algúns.

El Mazaricos hace públicos los wasaps con el Ponteceso

m. r. suárez

—Como se deu a conversa?

—Coincidimos no Bergantiños un ano. Había tempo que non falabamos e, como nos iamos enfrontar o domingo, pois xurdiu así. De feito, nin lembro quen a comezou. Cando eu lle digo de darlle ó Ponteceso entre 1.000 e 2.000 euros por deixarnos gañar por dous goles máis que o Tordoia ó Belvís nin penso na posibilidade de que iso suceda. Cóntollo totalmente de broma para que se bote unhas risas. Non cobramos por xogar e adestrar ó equipo feminino e imos ter cartos para pagarlle a alguén? Non ten sentido. Despois, non volvemos falar ata no propio partido, unha vez rematado, no que el me felicitou polo triunfo e eu deille as grazas.

—Hoxe en día, visto como se deron os feitos, arrepíntese de facer esa gravación?

—Si. Non o volverei facer nin tomar a broma debido ás situacións ás que pode levar. De feito, días antes de explotar todo isto, cando o audio xa rulaba polo entorno máis próximo, falei co presidente do Tordoia e cun irmán dun dos seus xogadores para pedirlles desculpas a todos polo que lles puido afectar a nivel persoal o sucedido, mais para dicirlles que non tiña problema en ensinarlles a conversación un día para que viran o que había. O mesmo fixen co capitán do Mazaricos e co do Ponteceso, dado que foron as persoas polas que máis sufrín. Mencionei os seus nomes no audio e víronse gravemente afectados.

—Considera que o Tordoia debería conformarse coa publicación destas mensaxes e desistir no intento de estudar o caso?

—No club temos a certeza de que con esta proba podemos demostrar que non houbo nada. Teño a conciencia moi tranquila. Non quero nin pensar se chegara a borrar a conversa... sería un caos, tiven a sorte de tela. Espero que con isto se aclare todo. Pode haber alguén que siga dubidando, pero iso xa depende da perspectiva con que o vexas. Respecto ao Tordoia, eles teñen que valorar as probas que viron ata agora e, se queren seguir, estou tranquilo.

---

---

---