Xosé Antonio Neira Cruz gaña o segundo certame Carlos Mosteiro

A obra do recoñecido escritor compostelá foi elixida de forma unánime entre as 12 que concorreron


A segunda edición do certame de literatura infantil e xuvenil Carlos Mosteiro, promovido por Barbantia e polo Concello da Pobra, xa ten gañador. Trátase do compostelá Xosé Antonio Neira Cruz, un escritor que conta xa con diversos premios e cun feixe de novelas e libros de relatos publicados. O seu traballo, titulado O enigma do baúl pechado, foi elixido polo xurado de forma unánime, de entre os 12 que concorreron.

Francisco Castro, director da editorial Galaxia; Patricia Mallo, gañadora da pasada edición do Carlos Mosteiro; e Pilar Sampedro, vogal de Barbantia e especialista en literatura infantil, reuníronse na casa consistorial da Pobra e, despois dun intercambio de opinións, deron a coñecer o seu fallo. Do relato gañador destacaron que se trata dunha obra que entronca coa literatura galega de realismo máxico, abordando un amplo abano de temas que van desde a amizade ata o multiculturalismo, pasando polo poder das palabras e polo relación interxeracional entre nenos e avós. Tamén fixeron fincapé na linguaxe poética e a cantidade de recursos líricos empregados polo escritor.

O relato de Neira Cruz, que ten entre os seus galardóns os premios Merlín e Lazarillo, comeza nun vertedoiro, cun cofre que só se pode abrir cando se xuntan rapaces de diferentes culturas.

Tanto pola calidade das obras presentadas coma polo prestixio do escritor que gañou, o Carlos Mosteiro demostra estar trazando unha traxectoria ascendente.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Xosé Antonio Neira Cruz gaña o segundo certame Carlos Mosteiro