Os que iniciaron as súas vacacións co comezo do mes de agosto estarán desesperados mirando as previsións meteorolóxicas que dan choivas para toda esta semana, e os que as tivemos en xullo acabamos igualmente desesperados pola negativa dos anticiclóns a instalarse sobre a comarca. Está tocando un verán de estar á sombra, outro máis, e aínda que deberiamos estar afeitos, unha non deixa de botar en falta temperaturas un pouco máis tórridas.
Pero, por sorte, nunca chove a gusto de todos, e contra todo prognóstico non son poucos os turistas que visitan Barbanza estas semanas que agradecen o ceo nubrado, as chuvieiras e as temperaturas por debaixo dos vinte graos. Deléitanse paseando polas praias e rúas suadoiro e chuvasqueiro en man, e a falta dun sol propicio para estomballarse na area ou mergullarse nas frías augas da ría, van de vila en vila coñecendo novos horizontes.
E digo que isto é unha sorte porque xamais viviremos do turismo de praia, e esta pode ser unha boa oportunidade para que quen nos visitan vexan que este territorio ten moito máis que ofrecer. De feito, está a selo. A pesar da pandemia, de que o covid volveu deixarnos sen festas e do tempo inestable, non están sendo un mal verán para a hostalería. Os hoteis e aloxamentos turísticos presentan boas cifras de ocupación, o desemprego no sector non deixa de baixar e estamos a converternos no refuxio da xente do centro e o sur da Península que fuxe das temperaturas infernais que levan padecendo todo o verán.
Ó fin e ó cabo, á sombra non se está nada mal.