Barreiras

Manuel Gago
Manuel Gago VERMELLO CONTRA O MAR

BARBANZA

18 mar 2021 . Actualizado a las 21:18 h.

Ooutro día tívenlle que explicar a un rapaz, licenciado en Ciencias Sociais e motivado para cuestións galegas, quen era Xaquín Marín. Mentres lle informaba, eu atendía con pasmo á miña propia explicación: na vida se me tería ocorrido que chegaría este momento. A inercia sería tirar algunha conclusión catastrofista sobre a mocidade de hoxe en día, pero permítanme, con todas as miñas forzas, refugalo. A cuestión é que cando llo expliquei, e lle amosei algúns exemplos do seu traballo, o rapaz reaccionou ben interesado. Non se preguntou por que non o sabía senón que quixo ver máis exemplos.

Estas barreiras de coñecemento entre xeracións existen e son lóxicas. Non creo que sexa moi distinto o caso de Xaquín Marín, ben coñecido en xeracións anteriores pola súa presenza diaria nos xornais, que as referencias a películas da nosa mocidade que xa non representan nada para xente máis nova. Estas novas xeracións acceden á prensa -no caso de facelo- sobre todo a través de Internet, onde é moi posible que coñezan a outros humoristas hoxe moito máis de moda.

Pero tamén estou certo que, ao xeito que non coñecen a ese Xaquín Marín de gran actividade nas últimas décadas, tampouco coñecen moito do resto da cultura galega actual. Nin do pasado nin do presente.