César Lombera: As mans que esculpen o mar

O artista manifesta que está vinculado á bisbarra desde a súa xuventude

s. g.
Ribeira / la voz

Cando César Lombera era só un cativo xa tiña moi claro que o seu mellor xoguete era a area da fundición que abrira o seu pai ao chegar a Galicia dende o País Vasco. Alí, á beira da ría de Arousa, coas mans e as roupas luxadas, comezou a darlle forma á que se converteu na súa paixón: a escultura. Agora, unha exposición na galería Mundo Creativo de Boiro amosa o crecemento e evolución deste artista que baña gran parte das súas ideas en augas do Barbanza.

«É unha mostra retrospectiva e máis ou menos representativa de toda a miña obra, onde se quixo plasmar a variedade de técnicas que emprego nos meus traballos», afirma Lombera. Unha obra que se caracteriza polo seu eclecticismo e na que aparece de maneira recorrente a temática marítima, a través de sereas, atúns ou golfiños esculpidos en aluminio. Tampouco faltan as figuras vinculadas á cultura popular galega, como Maruxa e Coralia Fandiño, máis coñecidas como As Dúas Marías. Sen dúbida, a estrutura orixinal da escultura destas irmás que está situada na Alameda de Santiago está a ser o prato estrela da exposición. O artista recoñece que esta peza é a máis especial que creou: «Custoume nove anos sacar o proxecto adiante, pero valeu a pena porque agora todo o mundo coñece a súa historia».

A obra escultórica de César Lombera viuse eclipsada polo éxito desta reprodución. Pero un Alfredo Brañas en Carballo, un Valle-Inclán en Pontevedra e outro en Santiago, ou a imaxe do Carrabouxo de Ourense son testemuñas públicas da súa dilatada carreira. «É das primeiras veces que teño a oportunidade de expoñer nunha sala privada, xa que a maioría das mostras que veño facendo foron a nivel institucional. Basicamente, os meus traballos son obras públicas e están na rúa accesibles a todos», explica o escultor.

Mundo mariño

Precisamente Boiro é un dos escenarios nos que se poden ver algunha das súas creacións. A fonte da Cachada, inspirada no mundo das sereas, cristalizou a relación do artista coas dúas temáticas das que bebe a súa obra. Por un lado, Barbanza: «Estou vinculado á comarca dende a miña xuventude e non só profesionalmente. Teño unha vinculación especial coa praia de Corrubedo». E por outro, o mar: «Sempre vivín en zona costeira e iso marcoume tanto a min coma ao meu traballo. Incluso ata hai pouco practicaba mergullo e facía pesca submarina».

Realmente o que lle interesa a César Lombera é o que hai debaixo desas augas. Por iso, ademais de esculturas metálicas, na exposición boirense exhíbense unha serie de pinturas de forma circular, ao modo de ollos de boi, a través dos que os visitantes poden observar o fondo mariño.

Cos caixóns cheos de proxectos por emprender, o escultor compaxina na actualidade a exposición das súas obras coa creación de pezas en pequeno formato, «que sempre son máis vendibles», afirma o artista. Porque segundo Lombera, corren tempos difíciles para a escultura: «Se antes xa era complicado, agora máis. Traballar cun material nobre coma o bronce para as pezas de exterior é caro, e son custes que os concellos non sempre poden asumir».

Pero o próximo xa está en camiño. O escultor está ultimando o primeiro molde da figura de Isaac Díaz Pardo. «Ademais dun gran escritor, era un excelente pintor e un promotor da cultura galega coma poucos», conta Lombera. A súa figura acompañará ás das Marías e Valle-Inclán na Alameda santiaguesa.

Mostra retrospectiva. A exposición, que recolle as pezas máis representativas da traxectoria do artista, pódese visitar de xeito gratuíto na galería boirense Mundo Creativo.

Obras públicas. A maior parte dos traballos de Lombera pódense ver nas rúas das vilas e cidades galegas. É o caso da escultura das Marías en Santiago ou a fonte da Cachada de Boiro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

César Lombera: As mans que esculpen o mar