A inspiración estaba nos versos

A poesía serviulle ao ribeirense Manuel Ayaso para saír airoso dun período falto de creatividade


ribeira / la voz

Din que é habitual que os artistas, sobre todo aqueles que teñen unha obra ampla, pasen por momentos en branco, períodos nos que a ausencia de inspiración lles impide gañar a batalla outrora doada cando se enfrontan a un lenzo en branco. A un dos máis grandes de Barbanza, o ribeirense Manuel Ayaso, tamén lle aconteceu o que el cualifica de «depresión creativa». Foi hai uns catro anos. Como era incapaz de pintar, o artista decidiu botar man da súa biblioteca particular, conformada por máis de tres mil volumes. Foron os de recoñecidos poetas os que chamaron a súa atención. Lendo os seus versos xermolou, case sen que o autor se decatara, o libro Debuxando a palabra.

A medida que lía os poemas de Rosalía de Castro, Eduardo Pondal, Curros Enríquez ou Valle-Inclán, a Manuel Ayaso brotábanlle ilustracións na cabeza, sempre vinculadas a ese imaxinario galego que caracteriza a súa obra, que ía plasmando a carón dos versos que transcribía. Nunca pensou que o froito daquel proceso que para el era como un adestramento acabaría convertido nun volume ata que lle expuxo o proxecto ao seu colega e compañeiro de batallas Alfonso Costa: «A el gustoulle a idea e propúxome trasladarlla a Javier Expósito, o fundador do Museo do Gravado de Artes. Foi el o que deu o empuxón definitivo cando se brindou a editar o volume».

Alfonso Costa deixou a súa pegada en Debuxando a palabra, pois foi o encargado de maquetar o libro; mentres que a poetisa Eva Veiga, ademais de poñer algúns dos seus versos a disposición de Ayaso, elixiu o título da obra, que o sábado era presentada no museo de Artes. Alí repousan xa os orixinais que deron pé a este volume, pois o artista ribeirense decidiu cederlle as ilustracións á persoa que viu interese público nun traballo que pretendía ser un tesouro persoal.

Terceira «Entredous»

O período de ausencia de creatividade que deu pé a esta obra xa é auga pasada. Manuel Ayaso atópase en plena efervescencia. Ven de colocar na Catedral, unha galería de Lugo, unha colección de 36 obras realizadas en acuarela con punta de prata, a súa técnica preferida, e está traballando, xunto con Alfonso Costa, na que será a terceira parte de Entredous. Ao igual que ocorreu nas coleccións anteriores, do que se trata é de que un comeza un cadro que remata o seguinte, e viceversa.

Costa e Ayaso levan xa varios meses compartindo lenzos en branco e teñen previsto concluír a comezos do 2017 unha serie que terá 60 obras. O obxectivo é que a Xunta lles permita exhibila na Casa da Parra de Compostela: «Queremos montar unha gran exposición, á que lle sumaríamos unha ducia de cadros propios cada un de nós». A segunda Entredous está espallada, xa que boa parte das obras que a integran foron vendidas, mentres que a primeira forma parte dos fondos do Museo do Gravado de Artes, unha sala que o artista de Ribeira considera referente a nivel mundial: «É un museo digno de estar nunha gran cidade, como Santiago, onde si tería o recoñecemento que se merece».

Para Ayaso é un orgullo ter acceso aos fondos que atesoura o centro de Artes e exhibir alí a súa obra, como sería recibir a Medalla Castelao que o alcalde de Ribeira, Manuel Ruiz, volveu a pedir para el: «Sería unha honra porque Castelao é unha figura emblemática».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

A inspiración estaba nos versos