Na Boliña ofrecerase ese anaco do porco o sábado como acto de apertura da programación da festa pagá
29 ene 2008 . Actualizado a las 02:00 h.Ao igual que ocorre no resto das localidades da comarca barbancesa, en Boiro está todo practicamente listo para o inicio da festa pagá por excelencia. Nesta ocasión, a programación de entroido arrancará cunha degustación de orella de porco. A cita terá lugar este sábado, a partir das sete da tarde, no Campo de Revelar, na zona da Boliña. Os promotores desta saborosa e enxebre iniciativa son os responsables da asociación de veciños Río Breiro. Conxuntamente co Concello de Boiro, esta entidade instalará unha carpa para o desenvolvemento da festa gastronómica. Ademais de orella de porco, no interior desta estrutura serviranse diversos produtos típicos destas datas, como orellas, filloas e bolicos. Do mesmo xeito, as persoas que acudan disfrazadas poderán participar nun desfile. De animar a xornada encargarase o dúo Reflexos. Os máis pequenos do municipio serán os protagonistas da xornada do domingo. Para eles hai organizado un gran festival, que dará comezo ás cinco da tarde no polideportivo de Santa Baia. Como en ocasións anteriores, non faltarán os xogos inchables nin os obradoiros, nos que os cativos boirenses poderán practicar, entre outras actividades, maquillaxe e globoflexia. As actividades dirixidas aos nenos tamén terán como escenario, na mesma xornada do domingo, o pavillón de Praia Xardín, onde terá lugar a actuación de Chrystyan Magic. O día grande do entroido boirense será o martes. As actividades deseñadas polo departamento municipal de Cultura para esa xornada arrancarán ás cinco da tarde coa instalación de diversos obradoiros para os nenos na Praza de Galicia. Para as seis da tarde está fixada a actuación, neste mesmo escenario, da agrupación cómica Cigani&Cia. Os veciños boirenses de todas as idades terán a posibilidade de lucir as súas vestimentas máis orixinais a partir das sete da tarde, hora para a que está previsto o inicio do concurso de disfraces e carrozas. A presentación e a animación do certame correrá a cargo dos integrantes do grupo Pista Catro. Por se o frío está presente nesta tarde de inverno, a organización servirá chocolate quente para todos os que acudan disfrazados.