Comercio e hostalaría préstanse a axudar a que o AF7 siga en Vilagarcía

Zona Aberta ofrécese a mediar entre torneo e Concello, e o presidente de Ahituvi fala de fórmulas innovadoras de patrocinio. Antes queren saber os porqués do AF7


vilagarcía / la voz

«É un torneo que xurdiu aquí, que se forxou aquí. Non deberamos chegar ao extremo de que marche, e menos para Sanxenxo, onde máis aló do verán non se fai ningún esforzo por este tipo de iniciativas». O presidente de Ahituvi, Ríchard Santamaría, falaba onte, subliña, a título individual, sobre a posibilidade aberta pola organización do Torneo Internacional Alevín Arousa Fútbol 7 de levar a súa criatura ao concello da ría de Pontevedra, logo da celebración íntegra das súas primeiras 22 edicións na capital arousá. Tanto Santamaría como a súa homóloga na presidencia da asociación de comerciantes de Vilagarcía Zona Aberta, Rocío Louzán, manifestaban onte publicamente o negativo que resultaría para a localidade a saída do AF7, prestándose en ambos os dous casos a poñer o seu gran de area para que o sangue non chegue ao río.

«Todo o que sexa eliminar calquera actividade cultural ou deportiva da axenda de Vilagarcía é moi negativo», sinala Rocío Louzán. E iso porque, na liña do subliñado durante anos polos responsables do campionato internacional cando falan do importante impacto económico das dúas fases do seu evento na vila e na contorna, o AF7 «é importantísimo. A xente que vén ao torneo pasea por aquí, compra aquí, come aquí... Todo este tipo de torneos son para nós fundamentais».

Así as cousas, desde Zona Aberta amósanse «abertos a volver a colaborar co torneo», unha relación que se extinguiu con anterioridade á chegada de Rocío Louzán á directiva da asociación. Pero sobre todo, e toda vez que a capacidade económica do seu colectivo dista de ser a solución ao problema que poida ter o Arousa Fútbol 7 cando barralla a saída de Vilagarcía, a presidenta dos comerciantes ofrécese a, «se é preciso algún tipo de mediación» co Concello, aparente destinatario das dúbidas que manexarían os responsables do torneo, «axudar para chegar a bo porto».

Claro que, para entrar na cuestión, Rocío Louzán precisaría dunha chamada do AF7. «Comigo non se puxo ninguén en contacto» sobre o particular, e «eu non sei realmente que tipo de problemática existe».

Na mesma liña se manifesta o presidente de Ahituvi: «Se eu soubese os porqués do AF7, quizais puidese entendelos». E é que, sendo un posible interlocutor co que buscar solución a ese insuficiente apoio de Vilagarcía que con certa recorrencia salientan desde o AF7, «non coñezo a fondo as razóns» de que o torneo estude o seu cambio de domicilio a Sanxenxo, di Santamaría.

Diálogo si, globos sonda, non

«A posible marcha do Arousa Fútbol 7 de Vilagarcía é mala. Hai que entender que naceu aquí, e se tes un contratempo, non podes fuxir. Deberas falar antes con outros actores sociais para tratar de que o torneo quede» e non, diríxese Santamaría á súa organización, «chegar a este extremo», nin tirar, como «outros anos xa», deste «tipo de globo sonda, buscando forzar un pouco o apoio do Concello».

O presidente de Ahituvi, colectivo que aglutina a uns 40 hostaleiros de Vilagarcía, entende que «o primeiro que habería que saber son os porqués do AF7», considerando que ata hoxe as declaracións públicas dos seus responsables dan a entender razóns sen expoñelas. «Deben ser claros no que queren, e unha vez saibamos cal é o problema, tentar solucionalo». No seu caso, e sobre a base do que están a barallar as entidades reunidas recentemente arredor da mesa de turismo local, unha posible vía de traballo pasaría por «ao mellor pensar nun convenio entre asociacións de comerciantes e hostaleiros e promotoras de eventos deportivos e culturais da vila para negociar patrocinios conxuntos con empresas, e depender menos das administracións».

Chegados a este punto, Louzán e Santamaría coinciden en que «hai que chegar a unha solución» que poña fin aos titubeos recorrentes do AF7 sobre a súa continuidade en Vilagarcía.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Comercio e hostalaría préstanse a axudar a que o AF7 siga en Vilagarcía