Cantigas de amigo a ritmo de rap

O centro gaña un concurso de vídeo convocado co gallo da exposición do Pergamiño Vindel en Vigo

.

cambados / la voz

Sediame na eu na ermida de San Simón / e cercaronmi as ondas que grandes son / eu atendendo ao meu amigo / eu atendendo ao meu amigo, canta Mariña Area cunha doce melodía, vestindo coma no medievo e nunha bucólica estampa ao pé da torre de San Sadurniño. E nisto aparece Carlos Caamaño con roupa deportiva e sóltalle a ritmo de rap: rapaza céntrate na actualidade / non é sitio unha ermida para intimar co teu amante.

Así arrinca Cantigueando, o vídeo co que o instituto Francisco Asorey vén de gañar o concurso convocado polas secretarías xerais de Política Lingüística e de Cultura co obxectivo de promover a lírica medieval co gallo da exposición do Pergamiño Vindel no Museo do Mar de Vigo.

A traslado deste valioso documento a Galicia, o pasado ano, serviu de pretexto, entre outras moitas cousas, para amosarlle aos mozos que na Idade Media xa se compoñían cancións de namorados, e facíase en galego. «Unha das cousas que lles pareceu máis curiosa é que naquela época estivera tan valorado o galego, fronte ao que ocorre agora», segundo sinala Aurora Souto, profesora de Literatura Galega no instituto, quen xunto cos mestres Santiago Rey y Moisés Amado axudaron aos alumnos con este traballo.

Co vídeo querían amosar que pasado e presente poden ir da man, e abofé que o conseguiron. Quen lle ía dicir ao xograr Martín Códax que as súas composicións serían cantadas por rapaces do século XXI, con fondo de batería e gravada nun vídeo. Moitos factores confluíron para que tal cousa sucedera. O principal é que o comerciante de libros antigos Pedro Vindel atopara o documento nunha libraría, aló polo 1914. Durante o século pasado o pergamiño viaxou por Suecia, Reino Unido e Estados Unidos, e en outubro chegou por fin a Galicia, ao Museo do Mar de Vigo, onde estará exposto ata o mes de marzo.

Ata alí foron un grupo de alumnos do terceiro da ESO e primeiro da Bacharelato para coñecer esta xoia da cultura galega e outros poderán volver grazas a este premio, que inclúe como agasallo, ademais, unha excursión ao Museo do Mar, unha visita á illa de San Simón, unha cámara de vídeo e un diploma.

Cantigueando non é só unha demostración de creatividade e talento; a Carlos e a Mariña contaralles para a nota, igual que aos compañeiros que puxeron a música aos seus versos: Alexandre Otero, Iván Cacabelos, Rodrigo García, Mariña Chaves e Isidoro Baúlo. Entre todos foron quen de reinventar as cantigas de amigo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Cantigas de amigo a ritmo de rap