A Cariñosa era onte a primeira das arredor de 40 embarcacións participantes en cubrir o trazado da vixésimo sétima edición da Volta á Illa de Arousa en Dornas a Vela, empregando 2 horas e 23 minutos para atravesar a liña de meta situada na mesa saída do Bao. Pero non sempre o primeiro resulta ser o campión. A organización da regata raíña da dorna a vela decidíu a descualificación de A Cariñosa por saltarse a primeira boia do percorrido, á que chegou cunha chea de competidores apelotonados, e non proceder á pertinente rectificación antes de proseguir a navegación cara a chegada da Volta.
A gran beneficiada foi A Jalerna de Ricardo Dios e de Manuel Cartarola, que con 4 minutos empregados máis foi recompensada co título de vencedora. A Nécora de Braulio e de Larry fíxose co segundo chanzo do podio a un minuto da gañadora oficial, e a Pereka de Chico e de Dorado rematou terceira. As catro embarcacións mencionadas defenderon o nome do club organizador, a Asociación Cultural e Deportiva Dorna da Illa.
A proba estivo marcada por unhas excelentes condicións de navegación, con entre 8 e 10 nós de vento, e pola elección que á altura do faro do Galiñeiro tomaron as diferentes tripulacións. As que optaron por navegar achegadas á terra remataron vendo recompensada a súa decisión.