A tripulación do Xacobeo 2010 Galicia , patroneada por Juan José Durán e baixo a grímpola do Liceo Casino de Vilagarcía, finalizou o domingo sétima na duodécima edición do Trofeo de Su Majestad La Reina da clase Platú 25, disputada en augas de Valencia.
O programa prevía dous días de competición, pero a falta de vento o domingo obrigou á suspensión da derradeira xornada, validando deste xeito a clasificación provisional fixada tras as catro saídas ao mar do sábado.
O Iberdrola do mallorquín Manu Weiller (R.C.M. del Abra) revalidou así o título con 11 puntos, con tres triunfos parciais nas catro mangas computadas. O Aceites Abril de Pablo Iglesias (R.C.N. Vigo) foi segundo con 12 puntos, e o MundoMarino 25 de Álvaro de Haro terceiro con 17. O Xacobeo 2010 sumou 33.