Luki, dianteiro do Ribadeo FC: «Estamos demostrando poder competir con calquera»
RIBADEO
Luki analiza o derbi de colosos mariñáns que o Viveiro e o Ribadeo disputaron o pasado domingo en As Valgas (2-2). O sábado volverán medirse na Copa Deputación
25 dic 2019 . Actualizado a las 19:53 h.O derbi de As Valgas foi o derbi de Luki. O extremo de Friol levou case todo o perigo do Ribadeo e estableceu o definitivo 2-2 no minuto 93.
-Meteu dous goles, tivo outro man a man, e xa no 95 ese disparo que detén Rubén. Seguro que no Viveiro algún tivo pesadelos con vostede...
-A verdade é que se deu un partido no que todo apuntaba a min. Sentinme cómodo e foi bonito meter eses dous goles. Outros días tócalles a outros compañeiros.
-Parécelle xusto o 2-2 final?
-Si porque foi unha parte para cada equipo. Na primeira parte estivemos mellor nós, a excepción da ocasión que tivo Álex Meitín, e na segunda parte dominaron máis eles.
-A pesar de todo o que se coñecen os equipos, na primeira parte puideron correr cómodos.
-Martín e Mario son moi bos. Estiveron moi ben, sobre todo no xogo aéreo e iso dános un plus. Ademais, os medios traballaron moitísimo, e iso deunos liberdade aos catro homes de arriba.
-Saen reforzados como candidatos a estar na zona alta tras o derbi?
-Iso amosan os resultados. Estamos demostrando que podemos competir con calquera. Pero non sei se saímos reforzados. Por como se deu a primeira parte, non, porque merecíamos máis. Pero por como se deu a segunda parte, na que o Viveiro non superou fisicamente e tivo o balón, si, saimos reforzados.
-É inalcanzable o Viveiro no cumio da clasificación?
-Eu penso que si. Son un equipo doutra categoría. Tanto física como tecnicamente están a un nivel altísimo.
-Pero téñenlle tomada a medida.
-É certo que sempre lles competimos ben, pero son un verdadeiro equipazo.
-Este Ribadeo non parece notar o exilio polas obras do Pepe Barrera.
-Traballamos para estar arriba e estamos mellorando todos os nosos números con respecto ao ano pasado. Rafa (Casanova) sempre nos fixa ese obxectivo de mellorar, e desde que estou aquí sempre imos indo a máis.
-Tamén vostede. Xa igualou os sete goles do curso pasado. A cantos chegará?
-Sempre me intento superar, pero o importante é o equipo. Hai días que se axuda máis sen sequera marcar.