Alfonso Villares: «É difícil meter nas cabezas que hai que separar a materia orgánica»
CERVO
Ecovoz 2022 | O Concello de Cervo, do que Villares é alcalde, acollerá unha das novas plantas de biorresiduos que impulsa Sogama para o tratamento da materia orgánica
14 mar 2022 . Actualizado a las 05:00 h.A do Concello de Cervo será a terceira planta de compostaxe en Galicia. A terceira dedicada de forma exclusiva ao tratamento e á xestión dos coñecidos como biorresiduos domésticos. A Xunta, a través de Sogama, ten previsto investir 6,4 millóns de euros nunhas instalacións que ocuparán uns 8.000 metros cadrados de superficie e que atenderán a quince municipios da zona norte de Galicia. Alfonso Villares, rexedor de Cervo, explicouno en Radio Voz:
—O modelo de recollida transfórmase para adaptarse ás directrices europeas. Qué cambios espera?
—A verdade é que os tempos que nos veñen agora, en todos os aspectos da xestión de residuos, van producir un gran cambio sen dúbida ningunha. E o feito de que unha planta de biorresiduos estea situada na nosa comarca, é moi positivo, tamén para a eficiencia dos recursos que temos nesta zona. Ademais, é evidente que para nós é aínda mellor que estea colocada no noso concello. Aquí dispoñemos do polígono industrial de Cuíña e eu creo que iso foi fundamental para a súa ubicación. Así que estamos moi satisfeitos, moi contentos, aínda que nos queda moitísimo traballo por adiante porque a planta vaise construír agora xa, pero o reto máis grande será concienciar aos veciños de facer esta reciclaxe dos residuos orgánicos.
—E como levan esa parte, a da pedagoxía aplicada aos veciños?
—Se todos tivésemos o recordo do pasado sería máis doado. Eu son de aldea e creo que todos os que vivimos nas aldeas de Galicia, antes facíamos una xestión dos residuos orgánicos do mellor modo posible. Ou todo ía para os cochos ou para propios galiñeiros ou para abono. A dificultade vai ser máis grande nas zonas urbanas. Nas nosas aldeas tamén é certo que nos últimos anos fomentamos moito a distribución de composteiros, pero non todas as casas teñen un. O difícil, tal e como digo, reside e está na zona urbana, e en meter nas cabezas, no día a día, que hai que separar e aproveitar esa materia orgánica. Xa non temos eses animais domésticos, agora terémolo que botar nun caldeiro biodegradable para que despois acabe depositado nesa nova planta.
—E que nos pode contar de como se vai tratar esa materia?
—Unha vez que chegue aí, o resumo sería dicir que se vai crear abono. Sería como se fai nos propios composteiros. Mesturaranse os residuos orgánicos con materia verde para crear ese sustento necesario para que haxa a fermentación. E o que haberá que coidar nesa planta serán todos os lixiviados e olores que se podan producir. Pero o final o destino será a produción de compost e de abono. A construción vaise empezar agora e a previsión da Xunta é que estea lista neste ano. Iso quere dicir que os concellos que imos derivar residuos á planta temos que empezar a traballar xa en concienciar aos nosos veciños porque os residuos teñen que ir da forma máis correcta para que non se estrague a produción.
«Agora hai que contarlle aos veciños que chega ese quinto contedor»
Galicia alcanzará o 2023 cos deberes feitos. «Estamos no camiño e creo que a Xunta está a xestionar este asunto con acerto». Porque, antes de que remate ese ano, España deberá cumprir coa normativa europea que obriga a ter en funcionamento un sistema de valorización dos biorresiduos domésticos e, no caso da nosa comunidade, «estamos adiantándonos máis dun ano. É unha antelación suficiente». Agora, tócalle os concellos —engade— «dar ese paso e facelo desde a unión. Xa estamos coa construción das infraestruturas e agora hai que contarlle aos veciños que chega ese quinto contedor» porque «o éxito deste programa» dependerá, non só da anticipación, senón de que se faga «ben».
—A planta que se instalará en Cervo prestará servizo a toda a zona norte.
—Así é, tanto a zona norte de Lugo como da Coruña. Onde estriba a dificultade será nas poboacións máis urbanas como Foz, Ribadeo ou Viveiro. É un traballo que temos que facer da man, é un mandato europeo, non hai volta atrás, temos que facelo si ou si. E creo que desde a unión podemos conseguir que esta nova xestión sexa un éxito. Hai que intentar pechar o círculo da economía circular, o residuo orgánico é moitísimo e hai que pensar non só no presente, senón tamén no futuro. Non hai alternativas de facer as cousas doutro xeito.