«O PSOE podería repetir o programa porque nada fixo»

Critica a falta de xestión do Goberno e pídelle a Llano que diga se se irá para o Senado ou se quedará en Burela


BURELA / LA VOZ

Manuel Rouco López naceu no municipio de Xove en 1977 e leva quince anos vivindo en Burela, concello que aspira a gobernar liderando a lista do PP. É graduado en enxeñería agrícola e do medio rural pola USC, titulado en enxeñería técnica nesta mesma rama na especialidade de mecanización agraria e construción rural e ten un máster en prevención de riscos laborais. Rouco é o presidente da xestora do partido desde comezos do 2018 e foi confirmado candidato á alcaldía o pasado xaneiro. Enfrascado de cheo na campaña e tendo en conta a máxima do PSOE de «unha persoa, un cargo», Rouco cre que o candidato socialista, Alfredo Llano, debería «ser xusto cos veciños e coas veciñas de Burela» e dicirlles se, no caso de ter esa posibilidade o día de mañá, vai marchar para o Senado ou vai quedar en Burela.

-Por que decidiu dar o paso de presentarse?

-En principio o que se me propuxo foi reconstruír a agrupación local desde dentro. O que non contaba era que os compañeiros me elixiran de forma unánime como candidato. Creo que era necesario dar o paso polo estado no que se atopa Burela. É un despropósito. Cantos proxectos dos anunciados se levaron a cabo? O PSOE podería repetir o mesmo programa porque nada fixo. Cando entraron a gobernar criticaron obras do anterior goberno, do PP, pero o que entre agora a gobernar Burela atoparase con que nestes catro anos non se fixo nada. Non houbo xestión, non houbo nada.

-Moitas caras novas na súa candidatura, na que non se inclúen todos os edís actuais.

-Continúa Pepe Casas. Penso que un proxecto novo tamén require de caras novas. De feito, había un sector da agrupación local que pedía unha renovación total, pero penso que a renovación debe ser tranquila e consensuada, e necesitamos tamén da experiencia da xente que estivo en política, como Casas e Xusto Eijo. Na nosa candidatura hai once caras novas que tiveron o valor de dar un paso adiante nunha situación complicada. Case a metade dos integrantes da lista teñen formación universitaria, e tamén a integran persoas cun grande éxito no sector empresarial.

-Custoulle moito facer a lista?

-Para nada. Practicamente todos me dixeron que si á primeira.

-Dígame dous proxectos urxentes a acometer en Burela.

-É básico ter o bo polígono. Somos o único concello que non ten un polígono desenvolvido. Hai dúas empresas importantes que se queren asentar e aínda están valorando ficar en Burela porque non hai parcelas. Outro proxecto fundamental é a estación depuradora de augas residuais. A EDAR que temos é insuficiente para a poboación que hai. Estivemos valorando a posibilidade de que se constrúa unha EDAR máis moderna, que non emita olores nin impacte visualmente. Neste sentido, tampouco debemos perder de vista a modificación do regulamento de Costas.

-Que lle parece que en Burela se presenten nesta ocasión tantas candidaturas políticas?

-Creo que iso necesariamente non ten que ser malo. Creo que é san na política, en democracia. O que debería estar preocupado é o actual equipo de goberno. Os veciños van ter que decidir en pouco máis dun mes se queren que o PSOE siga afincado no goberno ou non. A única alternativa real de goberno é a do PP.

-Deu explicacións sobre as acusacións do PSOE de que vostede exercía como xuíz de paz en Cospeito, quere engadir algo?

-Ante esta broma o único que esbozo é un sorriso. Denígranse eles sós insultándome.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«O PSOE podería repetir o programa porque nada fixo»