Unha das novidades desta edición dos María Casares estaba fóra do teatro. A organización decidiu darlle aos nominados un paseo en limusina para que puidesen celebrar os trinta anos de existencia da profesión con algo que fixese xogo coa alfombra vermella.
As actrices e actores foron subindo a uns centos de metros do Rosalía de Castro e disfrutaron do paseo todo o rápido que permite o tráfico no centro coruñés.
Unha viaxe fugaz e un pararse diante do teatro para que a imaxe quede completa: os candidatos saíndo da limusina para ver se o seu nome sae gañador.
Banda sonora
Para que os posibles gañadores non baixaran sen banda sonora, a fanfarria obrigaba á xente a facer grupo pouco antes de que Suso de Toro lembrase que cando se cumpren trinta anos o lóxico é entrar na madurez.