Monsiváis era a voz crítica de México. Inventor dun xeito particular de facer crónica, ollaba cada día a realidade do país cun xeito intelixente, transversal e lúcido de ver e de dicir, dun xeito que só permite o amor. A despedida dos seus restos transformouse nunha manifestación multitudinaria e espontánea de dor e de esperanza, na que se confundían os berros de: ¡Viva Carlos Monsiváis! e ¡Viva México!
Na escaleira de Bellas Artes, onde os seus amigos e compañeiros velaron o cadáver, quedaban milleiros de rosas brancas que a xente procuraba. No primeiro andar, os rostros dos murais de Sequeiros, Orozco e Ribera compartían o sentimento colectivo de perda. Na realidade diaria do país queda un baleiro difícil de encher porque, como recoñecía Elena, estrañarase ao Monsiváis humanista, ao de todos os días, pero tamén ao Monsiváis do gran sentido do humor.