Manolo Piñeiro, xerente de César Antigüedades: «En Galicia valóranse moito as pezas de Sargadelos e o Castro»

«Conservamos o nome do negocio en honor ao meu pai, que foi carpinteiro e ebanista durante case 60 anos», conta Manolo Piñeiro (A Pontenova, 1970), xerente de César Antigüedades, que se dedica á compravenda de obxectos desde hai xa 26 anos, aínda que non sempre foi así. Nos seus comezos, César e Manolo fabricaban réplicas de enxoval antigo. «Nos anos 2000 houbo un boom de rehabilitación de casas para o turismo rural, o que levou a unha gran demanda de mobiliario. En ocasións, para abaratar custos, facíanse réplicas de modelos pasados, pero feitos na actualidade. Aí foi cando unha serie de anticuarios contactaron connosco para que llos preparásemos», conta Manolo. A relación cos anticuarios foi o primeiro paso na transformación do negocio, o cal, a día de hoxe, xa non traballa a confección de mobles: «Centrámonos na compravenda dos obxectos máis demandados pola xente na actualidade. En Galicia interesa moito a cerámica de Sargadelos e a de Castro». Aínda así, o lucense non rexeita ningún tipo de artigo ao instante. «Nunca se debe descartar nada á primeira impresión, porque ás veces podes levar unha grata sorpresa. Hai unha semana, enviáronnos fotos duns mobles que, en principio, non nos interesaban, pero dentro deles, había unhas figuriñas de prata que si, polo que sempre é recomendable revisar todo», explica.

É CLAVE ANDAR CON OLLO

Todo o que compran e venden gárdase nun gran almacén situado no concello da Pontenova, en Lugo, pero nunca pensaron en ter unha tenda física. «Practicamente facemos todo de forma online: redes, correo electrónico, WhatsApp... Facemos unha pequena triaxe do que nos ofrecen por esas vías, tanto profesionais coma particulares. Se nos encaixa, desprazámonos para avaliar os artigos en persoa, e se nos interesa, facemos a transacción alí mesmo», detalla Manolo. Con todo, non sempre as negociacións chegan a bo porto.

Despois de máis de vinte anos á fronte, Manolo enfrontouse a varios intentos de estafa: «Este é un negocio no que cha intentan coar moitas veces. Tentaron trabucarnos con todo: cousas de arte sacro, que realmente eran modernas, pezas de suposta prata, que estaban fabricadas noutro material...». Engade, ademais, que aínda que moitos vendedores tratan de enganalo, hai outros que simplemente pensan que posúen algo de valor e que merece ser comprado por un bo importe. «Isto sucede moito coas herdanzas. As familias chámannos e ofrecen a cubertería de prata da súa avoa e, logo, cando vas tasala, decátaste de que están feitas doutra cousa e fasllo saber. Case sempre se sorprenden, non o fan con mala fe», engade. No entanto, o balance é máis que positivo. Tras miles de intercambios, César Antigüedades posúe verdadeiras reliquias, que moitísimos coleccionistas desexarían obter. «Tivemos de todo, recordo en especial un xogo de cabezas de Sargadelos, deseñadas por Luis Seoane, e unha figura de arte sacro do Apóstolo Santiago, que está feita de prata, mide medio metro e pesa tres quilos», revela Manolo.

O negocio lucense non só ten alcance nacional, tamén atende a clientes de toda Europa: «Temos unha gran relación con comerciantes de varios países veciños. Facemos coincidir as tasacións con algún evento que haxa alí. Por exemplo, desprazámonos a Francia cando se celebran varias feiras de antigüidades, nas que hai entre 700 e 1000 expositores. Aproveitamos esa viaxe para visitar a feira e, de paso, negociamos cos nosos clientes de alí», agrega. Para rematar, subliña tamén a importancia de non viaxar de forma compulsiva, xa que a loxística dos desprazamentos é un dos maiores gastos a finais de ano.

---

---