TVG estrea o documental sobre Celso Emilio Ferreiro

Luís Tosar interpreta ao poeta nesta longametraxe dirixida por Aser Álvarez e que conta con corenta colaboracións


Santiago / La Voz

Pouco antes da medianoite de mañá, 12 do 12 do 12, un amplo retrato de Celso Emilio Ferreiro asomará ás pantallas da Televisión de Galicia. É o documental de Aser Álvarez 100% CEF, unha longametraxe que cun amplísimo reparto de colaboradores pretende explicar a vida de Celso Emilio Ferreiro pola parte seria e «facer del un pandeiro» pola lúdica.

Neste documental é Luís Tosar quen interpreta a Celso Emilio nas súas paisaxes e tecleando na vella máquina de escribir. Pero ademais desa figura reinterpretada, a longametraxe conta coa opinión de corenta persoeiros que van completando un retrato biográfico e literario para apreixar a complexidade e a amplitude da figura do escritor de Celanova.

O director do documental asume unhas palabras do poeta Joaquín Marta Sosa, «Celso Emilio non cabe en ningún documental», e explica que a súa intención foi facer unha película como «aproximación contemporánea, non académica e fresca» sobre unha figura «controvertida e polémica».

O documental conta, por unha parte, coas opinións de familiares do escritor e especialistas na súa obra, como os seus biógrafos Xesús Alonso Montero e Ramón Nicolás. Méndez Ferrín, Neira Vilas, pola parte literaria, son voces que se suman á de músicos como Luis Emilio Batallán, Mini e Mero ou Labregos do Tempo dos Sputniks.

Á parte literaria e musical súmase unha artística na que se conta coas colaboracións de Baldo Ramos, Francisco Leiro, Manolo Paz ou Baldomero Moreiras, para completar o retrato dun autor que está «radicalmente vixente» segundo o director do documental.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
14 votos

TVG estrea o documental sobre Celso Emilio Ferreiro