Tres orixinais optan ao galardón, que se falla o vindeiro xoves
05 jul 2015 . Actualizado a las 05:00 h.A 15.ª edición do Premio de Novela por Entregas que convoca La Voz de Galicia en colaboración con Ámbito Cultural de El Corte Inglés xa ten tres finalistas. Trátase dos orixinais A virxe das areas, presentada baixo o lema Paco Louro; Sobrevivindo, co lema Xoabela; e a enviada co título de Sempre navegar. O xurado elixirá a gañadora de entre as tres propostas o vindeiro xoves día 9, e o fallo darase a coñecer no transcurso dunha cea literaria que se celebrará no Museo Santiago Rey Fernández-Latorre, nas instalacións de La Voz en Sabón.
A virxe das areas relata unha historia ambientada nunha vila da Costa da Morte e que arranca coa misteriosa aparición en 1981 dunha moza en circunstancias misteriosas. Un dos veciños comezará a pescudar unha explicación ao feito e dará con sorprendentes revelacións que mesmo afectan ao pasado distante.
Pola súa banda, Sobrevivindo ten como protagonista central a unha muller que tras vencer nun programa de telerrealidade se converte en empresaria de éxito, mais tan celosa da súa intimidade que ninguén ten tratos con ela. Unha cea de exalumnos do colexio a devolverá ao primeiro plano das relacións sociais pero con consecuencias imprevistas.
Por último, Sempre navegar ten como punto de partida o vello ático que unha muller aluga en Vigo para mudarse coa súa filla pequena. Nun antigo escritorio atopará un caderno que ofrece pistas dun ilustre visitante estranxeiro de ascendencia literaria á cidade.
A obra gañadora recibirá un premio de 6.000 euros e será publicada no xornal durante o mes de agosto, a razón de un capítulo diario. Nesas mesmas páxinas tamén se abrirá unha xanela ás inquedanzas literarias dos lectores que participen la sección Relatos de Verán. O prazo para enviar textos aínda permanece aberto, xa que se pecha o vindeiro día 15. As bases completas do certame poden consultarse na edición dixital de La Voz de Galicia.