Mingos Fuciños, no corazón do pobo de Melide


Sempre á beira da historia e da arte do vello Convento franciscano e da Obra Pía do noso admirado Segade Bugueiro, escenario que marcou en Mingos o amor pola historia da vila. Lembrar que unha mañá do verán do ano 1981 a súa xenerosidade ofreceunos unha casa na praza para instalar o Museo, que colocado na Biblioteca Municipal do Concello desde o ano 1978, tiña que desaloxar, por xa carecer de espazo… e nesa casa instalamos o Museo, moi ampliado xa, e inauguramos en febreiro do 1982. Sen o seu apoio e participación, o Museo quizais hoxe non existira.

Alí estivo o Museo gratuitamente, ata o ano 2000, que por razón de espazo, e tamén por mercar e recuperar para a vila o antigo Hospital de Peregrinos, foi como por subscrición popular se mercou e edificou o edificio actual. Na notaría da vila firmamos a compra os catro fundadores, en nome do pobo, que é o verdadeiro dono do Museo e do seu edificio; firmamos os irmáns Álvarez, Mingos Fuciños e eu. E seguindo o camiño trazado polo noso libro Terra de Melide do ano 1933, ideamos publicar un boletín como Centro de Estudios Melidenses, co primeiro número nese verán do 82; boletín no que el colaborou con varios traballos de investigación histórica, moi documentados e básicos na nosa bibliografía.

A mediados dos anos 80, a súa xenerosidade puxo a disposición o Castro da Graña, propiedade da súa familia, onde se fixeron varias escavacións pola Universidade de Santiago en colaboración con arqueólogos polacos; e os achados desas campañas están depositados no Museo.

Na política local, foi mítica a Unidade dos Veciños que el encabezaba, que tivera un grande éxito popular, saíndo nomeado como tenente de alcalde, nesa década de finais dos 80.

No eido da música, levou a afección a Toques, onde hoxe hai gaiteiros que herdaron a súa ensinanza; en Melide, coas súas filla Uxía e Xisela, fundou a Escola de Gaita e Percusión Axóuxere, con ensino gratuíto, por onde pasaron multitude de rapaces da vila, hoxe moitos deles gaiteiros.

Lamento agora que nos quedara por facer o libro da Música na Terra de Melide, do que temos falado tantas veces, pero logo a ampla actividade de cada quen foi pospoñendo e deixando. Agora quédanos o reto de non esquecer a súa memoria, e poñer a semente dunha fundación que lle faga cumprido homenaxe a este veciño da Terra de Melide, egrexio terramelidao por excelencia, nesta querida Praza do Convento, no corazón do pobo, a alma da vila.

Autor Xosé M.Broz Director do museo Terra de Melide

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
20 votos
Comentarios

Mingos Fuciños, no corazón do pobo de Melide