Este ano recoñece ás poetas Elba Pedrosa e Cátia Cardoso e aos cantantes Mondra e Diogo Piçarra
29 oct 2025 . Actualizado a las 04:55 h.30 de outubro• 20.30 horas • Auditorio de Galicia • Entrada libre • Galicia e Portugal teñen dende hai dez anos en aRi[t]mar, iniciativa nacida na Escola Oficial de Idiomas de Santiago, un punto de encontro en torno á música e á poesía. Esas son as dúas manifestacións culturais coas que toma corpo a Gala de Premios da Música e da Poesía Galego-Portuguesa aRi[t]mar, que na súa décima edición recoñecerá ás poetas Elba Pedrosa (galega) e Cátia Cardoso (portuguesa) e aos cantantes Mondra (Teo) e Diogo Piçarra (Faro) cos premios á mellor poesía e a mellor canción de ámbolos dous territorios.
A elección decídese en votación aberta, logo dunha primeira escolma, segundo Gonzalo Constenla, director da Escola de Idiomas e organizador da gala. Constenla presentouna onte no Concello, na compaña da alcaldesa, Goretti Sanmartín; do secretario xeral da Lingua, Valentín García; da poeta Elba Pedrosa; e de Vítor Belho, de Nordesía Producións, firma que dirixirá unha velada que conducirá Tati Moyano e Xurxo Souto e que contará coas actuacións dos propios galardoados. Mondra e Piçarra interpretarán as cancións que lles valeron este recoñecemento: «Quererse ben» e «Amor de ferro», respectivamente. E Pedrosa e Cardoso recitarán as poesías premiadas: «Onde imos agora» e «Nao sei voar mas tenho». A cidade de Braga tamén terá un recoñecemento, o do premio especial á promoción da irmandade galego-lusófona. A gala, que conta co respaldo da Xunta, do Concello de Santiago e da Deputación da Coruña, é de entrada libre até completar aforo.
O que naceu como un proxecto pedagóxico na Escola de Idiomas suma hoxe miles de votos a un e outro lado da fronteira. Con ocasión de facer unha década, a gala chega cunha publicación conmemorativa que repasa todas as edicións. «Se non existise, habería que inventalo», dixo Vítor Belho sobre aRi[t]mar, unha iniciativa que para a alcaldesa reflicte que Santiago «é un lugar especial na recepción e a sensibilidade na promoción da lingua e a cultura galega e portuguesa» e que permitiu a Valentín García expoñer que «o prestixio da nosa lingua aumenta cando vemos que somos recoñecidos noutros territorios».