Alejandro Quiñoá: «O noso consumo impacta noutras realidades e ten que ser responsable»

joel gómez SANTIAGO / LA VOZ

SANTIAGO

XOAN A. SOLER

O presidente da Coordinadora de ONGD é o representante dun colectivo de 46 entidades con 21.000 persoas asociadas e 1.600 voluntarias

03 feb 2019 . Actualizado a las 05:00 h.

A Xunta e o Concello de Santiago impulsan avances para a cooperación, afirma Alejandro Quiñoá, presidente da Coordinadora Galega de Organizacións Non Gobernamentais para o Desenvolvemento (ONGD). Esta entidade representa a 46 organizacións, entre elas a Asemblea de Cooperación pola Paz Galicia (ACPP), que tamén preside. Suman «21.000 persoas asociadas e 1.600 voluntarias», indica.

-Como é a situación da cooperación?

-Foi un fito que se aprobase o cuarto plan director autonómico de cooperación, para 2018-2021. Contempla de novo unha cooperación galega con selo propio, con elementos diferenciais, non é só unha translación da estratexia estatal, como era o anterior.

-Que elementos diferenciais?

-Introduce os países lusófonos como preferentes da cooperación galega; e favorece o traballo consorciado con organizacións portuguesas para a cooperación e na educación para o desenvolvemento. Tamén aposta por sectores característicos nosos, como a pesca e a acuicultura; e recoñece as ONGD como actores centrais da cooperación, coas universidades e algunha pequena empresa.