Varios talleres achegan aos escolares unha diversidade de culturas artesanais
08 jun 2011 . Actualizado a las 06:00 h.Que o mar é cultura ben o amosan as obras de grandes escritores como Melville ou Hemingway, quen precisou pouco máis de cen páxinas para contar todo o que se precisa saber acerca dun vello que pescaba só na corrente do Golfo e levaba oitenta e catro días sen coller un pez. A precisión coa que o nobel dá conta no seu célebre relato O vello e o mar de cada un dos ademáns e movementos do vello sen malgastar palabras é un exemplo para os comunicadores e un espello para os que coñecen o mar dende as súas fauces, os que saben como é por dentro ese medio que proporciona, ademais de literatura, alimento e enerxía. Pero quizá sexa máis exacto dicir que o mar é culturas, así, cun ese final, unha pluralidade de xeitos de vida con singularidades e trazos comúns. Achegar o mar aos novos a través da dinámica do xogo e as artes plásticas é o obxectivo da proposta de Novacaixagalicia na sede ferrolá da Fundación Caixa Galicia (981 330 280), que acollerá ata o 4 de setembro diversos talleres en torno á exposición Fillos do océano, un proxecto documental co que o artista Javier Teniente achega ao espectador a forma de vida de pescadores artesanais de diversos lugares do mundo, como a India, Senegal, Vietnam, Sri Lanka ou Madagascar, sen deixar á marxe Galicia e toda a súa tradición pesqueira. Concibido como un homenaxe aos pescadores artesanais que viven do mar e para o mar e que manteñen sobre o movemento das ondas o equilibrio da supervivencia, esta exposición fotográfica que ofrece agora Ferrol tras o paso por Vilagarcía pretende ser unha chamada ao compromiso. A contaminación e a actividade pesqueira irregular e indiscriminada están poñendo en perigo un medio que alimenta moitas culturas e moitas familias. O respecto a un medio natural que non nos pertence e o desenvolvemento sostible é un dos retos que non quere pasar por alto este proxecto no que Teniente comparte a comunicación da cultura do mar dende dentro, como só poden coñecelo os seus fillos. A viaxe é unha aventura que vai dende o manexo da almadraba, en Barbate, ata a degustación dunha salsa de anchoa que se vén elaborando dende hai 200 anos no pobo vietnamita de Mui ne. E no camiño, moito mar.