Os fotoxornalistas de La Voz de Galicia en Santiago, Xoán A. Soler, Álvaro Ballesteros, Sandra Alonso e Paco Rodríguez, inauguraron onte no salón de actos de Calo a exposición Compostela, un ano de Voz, que recolle as mellores instantáneas publicadas durante o ano 2008 nas páxinas de La Voz de Galicia. A mostra inclúe un total de 23 imaxes en formato xigante, que se presentan acompañadas da páxina orixinal do xornal na que foron publicadas. Deste xeito, o espectador pode observar o tratamento que leva unha imaxe desde que é captada polo fotógrafo ata que chega finalmente ao lector, integrada nunha plana e acompañada de texto. O alcalde de Teo, Martiño Noriega, e a concelleira de Cultura, Carme Hermida, participaron na inauguración da mostra, que poderá visitarse ata o día 30 deste mes en horario de 17.00 a 20.00 horas. A visita a Compostela de Stephen Hawking é só un dos eixos da exposición, que recolle tamén os feitos máis salientables que teñen como protagonista non só á capital de Galicia, senón tamén a municipios veciños, como é o caso de Teo.