«Alén e o dragón» é o título da novela elexida polo xurado
17 ene 2026 . Actualizado a las 19:30 h.A firma pontevedresa Avigal anunciou que a obra gañadora do segundo Certame Literario de Novela Infantil Jaime Olmedo Limeses, iniciativa impulsada pola compañía co obxectivo de promover a creación literaria en lingua galega e fomentar o hábito lector entre o público infantil, é Alén e o dragón, de Olaia Sendón. Tras precisar que nesta segunda edición presentáronse corenta novelas infantís, destacaron o feito de que o xurado resaltou «a súa calidade literaria, a orixinalidade da proposta e a súa capacidade para conectar cos lectores máis novos».
De igual xeito, precisaron que este concurso consolídase como unha das principais apostas culturais de Avigal, enmarcada «no seu compromiso coa educación, a lingua galega e o apoio a novos talentos literarios». A obra premiada será publicada por Antela Editorial e será presentada ao público durante a semana das Letras Galegas, nun acto que servirá para celebrar a creatividade e a literatura infantil en galego que se desenvolverá no Museo de Pontevedra.
Ademais e como parte desta iniciativa, Avigal agasallará con 1.500 exemplares da novela gañadora a centros educativos e culturais de Galicia, contribuíndo, deste xeito, activamente á difusión da lectura en galego e achegando a literatura aos máis novos.
No que respecta á novela, subliñaron que «conquistou ao xurado polo seu dinamismo, personaxes ben traballadas e referencias á cultura popular». Trátase dunha obra ambientada en Sardiruña, un lugar onde nunca deixa de chover e onde Alén comeza a ter soños estraños con dragóns e vellas misteriosas».
A autora, Olaia Sendón (Ourense, 1978) é licenciada en Comunicación Audiovisual pola UAB e profesora na Escola de Imaxe e Son da Coruña. É tamén autora de documentais e pezas de videoarte presentes en diferentes concursos e festivais. Entre outras obras, ten publicados os álbums ilustrados A crebeira Marabillas e A fotógrafa Perpetua, e as novelas Nave e A casa grande.