A presente edición do programa Tornar as Táboas, iniciativa da Deputación de Pontevedra para levar o teatro aos distintos concellos da provincia, encara a súa derradeira semana. Este sábado, programáronse sendas funcións en Moraña e Vilaboa.
No caso deste último, a cita será na Casa da Cultura de Riomaior (18 horas) coa compañía Inventi Teatro. Coa obra A tropa do doutor milagre, Bea Campos, Marcos Alonso e Paulo Medal recrean un autobús «onde maiores e pequenos poderán probar de primeira man os efectivos produtos do Doutor Milagre».
En Moraña programouse ás 20 horas Trío de ases a cargo de Expresión Producións. Deste xeito, o Edificio Multiusos acollerá «un espectáculo terapéutico moi peculiar. Totalmente recomendado para renovar a enerxía positiva perdida durante o día».